حاول تلاقي عُذر للخيانة

حاول بس حاول

عرفني سبب الغدر

حقي عَ الحقيقة تشاوِر

الخيانة مِش خيانة واحد لواحدة مع واحدة تانية

ولا إلِّلي صَوَّرتُه عن الغيرة والأنانية

والجنان إلَّلي صابنِي على كَبَر

وأنا كُنت مَعمِيَّة وبهواك مِتحَنِّيَّة

وعايشَة مستورة وفاكرة متغَطِّيَّة

لأ دِي الخيانة خيانة عيش وملح

وقلوب صافية اتدَبَحِت فِ عز الفرح

وإيد اتمَدِّت فِ نُص الجرح

صَفِّت دم شريان كان عشمان

بس تسِيبُه يعيش فِ أمان

ليه استكترت عليه يداوي الألم بالراحة

والله قال الآه ف قلبُه وعارفَك سامعها

وبعلو صوتك بتضحك عليه وتدُوس

يبكي جُوَّاه بحُرقَة

يتمنى لو يكون كابوس

أيوا كان حاسس

ومن رُعبَك إنُّه كَشَفَك

قُلت للجن مخاوي

وعلى أذِيِّتَك ناوِي

وتعرَف إيه انتَ عن الطُّهر

وعن نقاء الروح إلِّلي بتسامح من غير شرط

وتضغط على نفسها وتقاوِح

وترَكِّب نفسها غلط فوق غلط

وبعزم قوتها تصُد الريح

وانتَ كل هَمَّك تجَهِّز لها الضريح

حاول تلاقي عُذر يتصَدَّق حاول

وأمّا تتكلم واجهني ف عنيَّا لَمَّا نتقابل

سيبَك من تخطيط الملاعين

وفِكر الأبالسة والشياطين

افتكر العِيش إلِّلي قسمناه نُصِّين

والطَّبَق إلِّلي أكل فيه اتنين

مكانش بيخلص مِ البَرَكَة ودُعا الوالدين

كسِبت إيه تقدر تقول؟

غضب ربنا عليك مفيش مَهرَب مِنُّه

وقسوة إلِّلي حبُّوك ودُعا قلوبهم بحُرقة عليك

إلِّلي شافِتُه عيونهم عُمرُه ما يِتنِسِي

والقهر إلِّلي عاشوه وذُلَّك لِيهُم

وهينسوا ازاي ظُلمَك وازاي فَرَّجت الكُل عليهم

لو استغفرت وأعلنت توبتَك

وحتى لو كان آخر يوم بعُمرَك

مفيش ولا حاجة تشفعلَك

ولا تبَرَّر غدرك وفِعلَك

حاول تلاقي عُذر لغدرَك حاوِل

************** 

بقلم الشاعرة/حنان فاروق العجمي