الأدب
شهاده الحموريه
زمن الساده والعبيد والضرب بالكرابيج
كرباج وره يسطى
متعلق فرد من غير واسطه
عاوز يوصل ومعهوش
بيحلم والحلم مجبهوش
حبس نفسه فى اوضه ضلمه
يمكن يطلعله عفريت
زى اللى بيسمع عنهم فى الحواديت
يقوله شبيك لبيك عبدك وملك ايديك
المال بالكوم لو عاوزه
وقصور وملك
ولا فى زمان الترك
لكن الموت والصحه والمرض
والمحبه الخالصه من غير غرض
لا حيله لى فيها ولا امر
صاحبنا طالت حبسته
والظالم بيزيد فى سطوته
لا المارد ظهر ولا الظالم عدل
لما خرج مسك القلم
وبدأ يزم المفترى والمرتشى
واللى عينه قويه ولا يختشى
يقتل القتيل بنزع الفتيل
ويمشى فى جنازته يقول اشى
واللى عايش لشهوته ومنتشى
لا همه سن ولا حرمه ولا فقير
بيبكى فى اوضه ضلمه
مل القلم من اللى انكتب
لا حرك ساكن
ولا علم حد الادب
قال يمدح ويطاطى
ويعمل ظهره مطيه
يمكن يدخل فى زمره
محاسيب التكيه
وينول العطيه
ولما ظهر فى الصوره
مبنشى غير مطيه
ولما نجح
اعطوله شهاده الحموريه
