إطمن أنا متألمتش 
وأنا آسف إني مسلمتش
وأنا ماشي بعيد 
بس أنت هتعذر تقصيري
مانا سايبك هتعيش من غيري 
وانا همشي وحيد 
هحكيلك اخر ما حصل لي
بس متبكيش 
وإن سألت أمي في تفاصيلي
برضه  متحكيش 
هتزود في القلب جروحها
وهتبكي كتير 
طبطب لي بإيدك على روحها
وبدون تقصير 
واسمعني لوحدك لو تقدر 
وبلاش تفكير   
حسيت بالبرد بيخطفني 
من غير إنذار 
وكأنه شايفني ويعرفني 
ومفيش أعذار 
مرضيش يستنى أما أشوفك 
من غير ما أختار 
وساعتها بقلبي اتمنيتك 
تحضن إيدي 
وتدفي القلب ويتحرك 
نبض وريدي 
ودورت عليك 
في وشوش الناس البهتانة
من عزم الخوف 
ملقيتش عينيك 
غمضت عيوني الدبلانة
ومرضيتش أشوف  
بعدها حسيتك تحضني 
بدموع وجروح 
مقدرتش أضمك بإيديا
ضميت بالروح
بعدها حسيت لمسة كفك
متحني بنور
والجو منسم ومعطر 
وكأنه بخور 
وملايكة ربي محاوطاني 
للبيت بتزور 
خليت البسمة على خدودي
للقلب دليل 
إن أنا متهني ومتنعم 
والصبر جميل 
أميت الناس لجل تصلي 
وبإسمي دعيت 
وأنا حاسس إنك بدموعك
ياما اتوضيت 
وقفلت بإيدك وفرقنا 
في الواقع حيط 
الناس بتودع وبتمشي
وأنت  استنيت 
المشهد كان أكبر منا 
ومتقولش وداع
أنا أجر ومتشال مع ربي 
في الجنة متاع 
أنا هاخد إيدك يا حبيبي 
ونعدي الباب 
والجيرة الشهدا وناس صالحة
هما الأصحاب 
ولأمي الرحمة المكتوبة
في الدنيا قبول 
والجنة جزاءها من المولى
وإن شالله تنول 
سلملي على الكل وطمن 
أغلى الغاليين 
الشهدا بإذن من المولى 
دايما حيين
 الشهدا بإذن من المولى
دايما حيين