الأدب
و ف عز الليل
و ف عز الليل
الحلم اتسرسب من عيني
و خرج يتمشى
فى الأوضة المسكونة آهات
ع السقف
راح راسم صورة
عصفور بيوشوش عصفورة
تضحك
فيعيد
و يقوم يسقيها بمنقاره
بعد ما يطعمها الحبات
و على الجدران
كانت أطفال
تجرى و بتلعب وسط جيران
فرحانة بكحك معاه بسكوت
بالدور ع الفرن يشيلوا صاجات
وفى ركن بعيد اخر الأوضة
البنت الحلوة القطقوطة
حاضنة ف أطراف رِجل أبوها
وتقول له احملني وهات لي حاجات
وعلى الأرضية رسم لي النيل
بيشق طريقه ما بين شطين
شط من الحب وشط حنان
وف مركب بينهم فيه عاشقين
يضحكوا وبياكلوا ف غزل بنات
ع الباب أشجار تين و بلابل
بتغنى و تتطلب تتقابل
وكمان أزهار
بتخلَِي الحزن قوام ينهار
وفراش بيطير ويَٓا العصافير
بيلحَٓن ليها الأغنيَٓات
وسرير جبار شايل أحمال
لصغار العيلة ف حضن كبار
خمسينة الشاى كدا ف إيديهم
و بيحكوا ف ذكرى تفرَٓحهم
وكإن العمر ما عدى وفات
و ف لحظة م الفجر يجينا
بيجرْٓ ف نوره يصحِٓينا
الحلم بسرعة بيتراجع
و ببسمة حنون بيودَٓعني
مع وعد بحلم جديد تاني
بالزمن الحلو الربَٓاني
و قفل بشويش باب الحكايات
#حواري_الروح
#عتاب_الناي
الشاعره همت_مصطفى
