الأدب

بيقولوا عتاب' بالعامية المصرية'

كتب في : الثلاثاء 04 اكتوبر 2022 - 7:23 صباحاً بقلم : حنان فاروق العجمي

 

 

روح يا عتاب وقُلُّه سلام

نسيتُه وزمانُه وعيشتُه والأوهام

والمركب أهي ماشية

ومجاديفي تجدف في بحر الأمل

وعدني بحري مش هرجع عطشانة

وإدَيَّا ومعاها جيوبي مليانة

وشقايا ف سكَّة عمرانة

ورسايلي سطورها مترَتِّبَة دروس مش فاضية

وبكرا اللي كارهينِّي يشوفوا الضربة القاضية

يا إيدي اتشبِّثي بالحبل

عنيَّا شايفة نتيجة الصبر

قدِرت أنَزِّل ع الشط الحِمل

هدوق طعم النجاح

واتحَنَّى بالفجر اللي لاح

تعبي وحقي أرتاح

وأشوف شروق شمس الصباح

ما عُدت هبكي ع اللي راح

أهو راح لحالُه هَم وانزاح

بالسلامة رَيَّح وارتاح

قالك فيها لأخفيها وخلاص خِفي

طلع م العقارب

وشرُّه واضح للأعمى مش خَفِي

مع السلامة ورُد الباب

سِكة اللي يروح ف الوبا

حوالينا كتير أحباب

وهنحِب الناس الرايقة

في طريقنا المية جارية وعقولنا فايقة

الله يحمينا إدينا سايبينها

ع الحلوة والمُرَّة أَدينا مقضِّيِنها

هتِتحَل على كيف كيفنا وبراحتنا

والحيرة ف أمرنا تحتار

مسيطرين والليلة كاشفينها

والحِيَل الرخيصة عارفينها

ادفنوا حقدُكوا ف الرمل

تيجي الموجة عليه تظهِر سوادُه

ما هو دا المكتوب

والله مفيش منُّه هروب

وقلوبكم المَهرِيَّة بكيدها

تِتعِصِر من غيظها

ابصُم بالعَشرة

وحياة اللي خانوا العِشرَة

الكُل وقف عند حَدُّه

ورسم لنفسُه دايرِتُه وحدُودُه

وشاهدة حروفي وف قبرٰه هيشهد دودُه

أول ما يدخل قلبُه يلاقيه فاضي

بِغلُِه مهري صاحي مش ميِّت بيتعذِّب

والعقل يقولُّه أنا كُنت ندمان وبَكَذِّب

وعرفت طعم الحسرة وف ذكرياتي بَقَلِّب

ويا ويل ويل ضميري اللي كان مُغَيَّب

ضميرُه وقلبُه يبكوا يسألوا والصمت مريب

يا ترى هنقابل مين ملايكة ولَّا شياطين

هنقول إيه لربنا كُنَّا مؤذيين

احنا القاسيين احنا البايعين

احنا اللي طمعنا وخُنَّا

رغم اللي أذيناهُم كانوا شاريين

احنا اللي هان الود علينا

وتركناهم يتألموا مُحطَّمين

سنين العُمر جِريِت

وأدِينا تحت التراب مدفونين

ولا حد يسأل علينا

ولا يجيب سيرتنا

إلا وقال يا ساتر كانوا ضالين

ما في حد دعالنا بمغفرة

الكل داعي علينا احنا العاصيين

وداع يا حياة وداع يا زُخرُف زايل

لا عاد ينفع نرجع ولا لينا فضايل

بقلم الشاعرة/حنان فاروق العجمي

 

 

بداية الصفحة