هَلَعُه يا هَلَعُه

بيقولوا كلامي وجَعُه

ضهرُه يا ضهرُه

كاسرة رجلُه وفرعُه

صيتُه يا صيتُه

بَرَّق بعنيه عفريتُه

نارُه يا نارُه

وَلَّع بإديه كبريتُه

سمعوا سمعوا

غيظُه وحريق تنطيطُه

قاضي يا قاضي

افتح ملف قَضِيتُه

والله ما نافعُه

صُحبِتُه وتنكيتُه

أبيض والشعر شاب

ودَّعوه يا شباب

دُقُّوا الطَّبل قفلنا الباب

ولا عايزين كلمة ولا جواب

خيبة يا خيبة

على راسُه بَطحَة وعيبة

سيرتُه يا سيرتُه

فين رجولتُه وغيرتُه ؟

ع المحطة قابلتُه

خلاص وراحت هيبتُه

صوَرُه يا صوَرُه

باين خَرَفُه وشيبتُه

زِفُّه وغنِّي يا مزمار

خَرَب بيتُه كان عَمار

احرَقُولُه ورق الغار

اصرفوا حُسَّاد الدار

عُقدَة يا عُقدَة

فُكُّوا واحدة واحدة

دي عصابة ومُتَّحِدَة

ع الفساد مِتعَوِّدَة

بالجنازير مِتقَيِّدَة

سواد وقلوبها مقَدِّدة

ليها طبَّالة معَدِّدَة

ف الرقص متشَدِّدَة

ف الحِلفان مُتَعَهِّدَة

الأخلاق مِضَيَّعَة

هَبِّت رياح وزَوْبَعَة

هيصة و شِلَّة مرَبَّعَة

غيبة ونميمة مبَقَّعَة

آخرِتها دِمعَة مخَدَّعة

بالشِّمال مِتلَفَّعَة

لابِس شُخليلة وبردَعَة

إيدُه فوق ومرَفَّعَة

ودماغُه بامية مقَمَّعَة

بقى قرطاس وإمَّعَة

أبوابُه آهي متشَمَّعَة

لو ساح هتحصل فرقَعَة

والحفلَة لسَّه موَلَّعَة

ع السطوح بيجري الفار

واقع في بير ملوش قرار

والسِّلِّم خلاص انهار

اتمَسَك مفيش فَرار

هَلَعُه يا هَلَعُه

بيقولوا كلامي وَجَعُه !!

_________________ 

بقلم الأديبة والشاعرة والكاتبة الصحفية

حنان فاروق العجمي