الأدب

' إلا كرامتي ' .. 'بالعامية المصرية '

كتب في : الأربعاء 09 نوفمبر 2022 - 8:42 مساءً بقلم : حنان فاروق العجمى

 

إلا كرامتي يا سيدهُم مش سيدي

لا إوعى تصدَّق يوم إنك دابح ف وريدي

ولا يوم هجيلك واركعلك

ولا أقولك الحقني يا سيدي

واهم ياللي الخسَّة دي طبعك

اعتبرُه إقرار لكلامي ومختوم

خُدُه عندك جَدِّي

وهَدِّي من نَفسَك هَدِّي

وآدي توقيعي وتوثيقي معاهم تأكيدي

ده أنا دارساك حافظاك خبرة وتمهيدي

آه والله يا سيدهُم مش سيدي

خلِص الكلام وعليَّ لا عتاب ولا لوم

كاسك فَضِّيتُه ف كاسي مَليتُه لآخرُه هموم

دا أنا على إيدك لَحَّنت وغَنِّيت المقسوم

وإيقاع حياتي معاك كان مُمِل ومرسوم

وصولي لنهايتُه دا كان أمر محتوم

وقال ماشي تعَيَّط وتسَمَّعهُم أغنية مغموم

ولسَّه فرحان بتقول فاكراك

مسكينة عنيك مش شايفاك

بيك من غيرك عايشة يا موهوم

رصيدي آه يا رصيدي

طِلِع فاضي ومصَفَّر عندك

وقلبي قلب جليدي

يا ملك القطبين بفضلك كان تجميدي

بجهلك كان وصمي لولا عقلي وتدبيري

ها وبعدين قول واشجيني

النوتة الموسيقية اتمَلِت بحروفك

وبلا فخر إعدادي وتلحيني

وآه يا مين يواسيني

والخيبة غطتني وحاوطتني

وفاضت وقالوا يا عيني

منها هنتعلِّم درس وعِبرة

وقعدوا يذاكروا سنيني

بقلم الشاعرة

حنان فاروق العجمي

بداية الصفحة