قالوا حُبِّك راشق

ف القلب جُوَّه وغارز

يا جدايل دهب رايق

وعلى جبينك قمح بيتعايق

نور نسرك وسط نيلك بارز

جناحاته يمين وشمال تحمي خلايق

يا أم الجلابية والأُوصَّة موجة عَفِيَّة

بحورك دي غنية

ورملك ألماس ساكن شط ومَيِّة

احموها بروحكوا يا قلوب نقية

على أرضها اتربينا كلنا شَبكنا إدينا

ولا شيء يهدمنا ولا يعطل خطاوينا

هنا كانت مشاريعنا

وحياة كريمة هنعيش أعمارنا

وبكرا نعَمَّر وهنبني جدارنا

وحارس على باب دارنا

سر قوتنا والعِدا قهرنا

فاكرين كدبة الخط

والعدو اللي اتفزع قام نط

والساتر اللي انهار بعزم جنودنا وإصرار

أحكيلكوا زغاريد القنال

وهقولكوا قصص الشُّهدا الأبطال

وعن معجزة اتخاذ القرار

والساعة اتنين الظُّهر

وأُم الشهيد والطُّهر

وعَبَرنا واتحَدِّينا الفُجر

ودبابة ماشية بتتغَندَر

بِتِرسم خِطَّة وتِتمَنظَر

وأذان وعَلَم بِيكَبَّر

يا عالي يا نَخل مقَدَّر

يا مدفع رشَّاش والثغرة بتكبَر

يا محمد يا مينا الله أكبر

سوا اصطادو ببنادقهم البط

حَرَّم يعوم ف المَيَّة

ودموعُه بتبكي ع الخَط

ويا فرحة ف حِتِّتنا ويا نور حاوِط بيتنا

اللمة لَمِّتنا والعِزوَة عِزوٍتنا

والقُدرَة قُدرِتُه قَوِّتنا

ويا شمع انقاد على عَتَبِتنا

كتبنا بدَمِّنا فرحتنا

وطير يا حمام غِيِّتنا

احمل للعالم رسالتنا

أرواحنا شايلينها على كفوفنا

واللي يقَرَّب لحاجتنا مفيش أعذار

وفورًا وبدون إنذار

ندُق بنعشُه مُسمار

خاف وابعِد دي عنينا بِتطَق شَرار

أُم الجبين العالي سيفها سيف بتَّار

************ 

بقلم الشاعرة/ حنان فاروق العجمي