الأدب
... ' فى ناس كده ' ...
فى ناس كده
مستنظرين الحزن يكسر عود صمودك
مستمتعين والدمع نازل فوق خدودك
دايما بيتمنوا الهموم تسكن حدودك
معرفش لية كارهين وجودك
بيموتوا لو يوم الربيع فتح ورودك..
مستخسرين الفرح فيك
عاشقين تملي دموع عينيك
الاسم قال خايفين عليك
والفعل دايماً إنهم
ناهشين في عودك..
وناس كده..
معلقين حلم النهار في خيوط ملامحك
زارعين حواليك الامل والحب طرحك
مبيفرحوش غير وقت فرحك
يتألموا قبلك في جرحك
بايعين عشانك عمرهم
ومكملين بيك حلمهم
لحظة سعادتك فرحهم
ومهما تأسى..
قلبهم.. دايماً يسامحك
وعشان كده.
أدفن في قلبك كل أوجاعك ودوس
لو كان طريقك كله شوك كمل ودوس
إياك تخاف يوم م الكابوس
لو شفته جاى بيرهبك
أبقى احبسه جوا الفانوس..
إياك تقول صعب ومحال
ارفع همومك لو جبال
وان حد سألك عامل أيه
رد ببساطة..
الحاله عال..
متقولش ايه جوا النفوس
خد م المواقف في الحياة عبرة ودروس
وان شوفت احلامك غراب
ارسم طاووس..
الشاعر سامح هريدى
