الأدب
عيد سعيد علينا
انسى الكلام الجارح
نسعد اللى حوالينا
واللى زعلان يتصالح
نتقابل فى الجناين
فى البيوت
يجمعنا رب الملكوت
بمحبة فى المطارح
صفى النية دى دنيا فانية
دى الضحكة لو كانت صافية
بتبين جمال الملامح
يالا نتصالح
العيد فرحة وناس ولمة
دبح وسنة وفتة ولحمة
صالح نفسك حتى بوردة
ناس بتصلى وناس بتكبر
يا محلا العيد الله اكبر
يالا نتصالح
لو عندك اخ مضايقك
رنله ولو تليفون
او روحله لغاية عنده
دحنا عليها ضيوف بنطوف
واللى يبيع اخوه مجنون
اى حاجة بتحصلك بتقول اخ
واللى يهاود شيطانه
اكيد واقع فى الفخ
اكسب عم لولادك
اكسب اخ
لو اختك عابت فيكى
ولمت الناس عليكى
او حتى كانت طمعانة
فى الخير اللى بايديكى
اوى تدخلى الغريب يشارك
دى الامعاء فى البطن كمان
تلاقيها بتتعارك
سامحيها وروحى لغاية عنديها
وبكل حنان وشوق وحب
خديها واحضنيها
هتلاقى دموع الفرحة بعد ندمها
مالية عنيها
انتى وهيا مفيكمش عوض
ولو وقفتم ع الواحدة
يبقى خلاص عليه العوض
والناس هتشمت فينا
عيد سعيد علينا
يالا روح لامك وابوك
وافتكر قد ايه شافوا المر
وهما بيربوك
حتى لو كانوا مزعلينك
زمانهم قاعدين عينهم عالباب
بكل حنين مستيينك
حتى لو حالفين ميت يمين
انك متحرم بالسنين
انت اكيد واحشهم جدا
هما اكيد ليك حانيين
روح واكسب دعوة حلوة
تنفع ولادك يا مسكين
عقلك فينك
برضاهم بس هتكسب دينك
وانسى اى كلام جارح
ويالا كفاية نتصالح
سامح اهلك سامح صاحبك
راضى عيالك وام عيالك
صفى قلبك وعيش مرتاح
نضف دارك وسامح جارك
وطفى نارك وعيش افراح
مش تقدرتعيش لوحدك
مافيش طير من غير جناح
عايز تعيش اجمل احسا
يالا نصالح كل الناس
ذى ما تحب تتعامل
عامل بود كل الناس
هو ده دينا الحنيف
دين الرحمة من الاساس
يالا نقول لكل الناس
انا من قلبى سامحت خلاص
ويالا نعيش اجمل احساس
