وعهد الله ما بتحبك ..

فـ لملم شوقك السارح

ورا طيفها في كل مكان

وفوق من وهمك الواضح

وصحصح عقلك الغفلان

وعَوَّد قلبك القسوة

وعَلّم روحك النسيان

وعيش بكرامة أحسن لك ..

وأيه جابرك ..

تعيش وياها وِبطوعك رخيص متهان .

قِبلت تعيش في حالة بتشبه الهزيان

عشان واحدة ماتستهلكش

وليه مااعرفش !!

وافقت تحب إنسانة مابتحبكش

وتسهر كل يوم لِيلك تِسح دموع

وتبكي بِحُرقة كالأطفال بصوت مسموع

وتتمنى تكون شيفاك

وِلو حتى تكون حساك

عشقت شيطانة مـ الآخر .. ومن خيبتك فاكرها ملاك .

كتبت الشعر في عينيها شهور وايام

وقلت مَفيش حبيب غيرها سنين قُدام

عملت منها محرابك .. وخليتها تصلي إمام

دي صدقني ماتنفعلكش ..

ولا كان توبها من توبك

دي ليها يجي الف حبيب

وكات عملاك يادوب واحد

شبه غيرك من المحاسيب 

وبِِتبَدل كمان فيكم ..وعملاكم كما المراكيب .

يا راجل عيب !!

متتشعلقش ..

وتمسك حبلها الدايب

ولا تكمّلش ..

فـِ سكة قلبها المهجور

فضلت كتير تعمَّر أرض خربانه

وفـِ الآخر بتطلع بور

حافظت كتير على عهودك

وهيَّ باعت لك الأوهام في شكل قصور .

حِلفت لها . تصون العشرة وتصونها وحلفت هي لَتبيعك

وتفضح سرك المستور

فـَ لمّ الدور .. وسيبها تغور 

دي واحدة في الأساس خاينة .. وكات باينه ..

ولكن قلبك الطيب عشان طيب مابيصدقش

ولا يفرَّقش من طيبته ...

ما بين الضلمه أحيانا وبين النور .

وروحت تحب إنسانة ماتشبهلكش

ورغم دا كله حبيتها

وهي في الأساس كارهاك مابتحبكش ..

وعهد الله مابتحبك .