ثقافه وفنون
فين حيطانك ياوطن
مات الضمير واندفن
وحجر الشيطان كان الكفن
لما البراءه تصرخ تلاالي
فين حيطانك ياوطن
ليه حنانك لناس وناس
حلم الغلابة هدمه ومداس
وفي القصور حرير ينداس
ياأرض فاح منها العطن
مات الضمير واندفن
أبكي ياعروق الدم بحرقة وولولي
مابقاش خلاص في بشر يختشي
صوت الأنا بيرن في الفضا
ومش مهم ان غيره ينتهي
ترابك بهمي أتحني
وفيك لحمي اتعري
ولغيري شايفك جنة
فين نصيبي من فرشة وسكن
مات الضمير واندفن
ياويلي ياناس من صمتي وياويلكم
أنا مقصر برضو زي تقصيركم
علي هم الغلابة يدوب بتصعب
واللوم علي ضميري قبل ضمائركم
ماهو الوطن أنت وأنا
ولو نحس ببعضنا
كان الامان يضمنا
ولا كان جرحنا يوم شجن
مات الضمير واندفن
_____________
الشاعر محمد العربى
