وجه الدكتور "محمد رمضان" مسؤول حملة كورونا بمستشفى بلقاس ، بالأمس رسالة توضيح وعتاب لأهالي مركز ومدينة بلقاس ، عبر صفحته الشخصية علي موقع التواصل الإجتماعي "فيس بوك" ..

وجاء نص رسالته كالتالي :

السلام عليكم ورحمة الله وبركاته

هناك بعض الأمور تحتاج إلي توضيح بالنسبه لفيروس الكورونا

أولاً : يأتي إلينا المريض يعاني من حالة مرضيه ونشتبه فيه فنقوم بأخذ مسحات وتحاليل معينه وترسل إلي الأماكن المعنية بالتحليل وفي حالة ظهور نتيجه سلبي نبشر الجميع وإن لا قدر الله إيجابي نحذر الجميع (تأتي النتيجه من الوزاره لنا وللأمن وللأهل ، كلنا في وقت واحد بعدها يتم تحويل المريض إلي الحجر الصحي بعد أربع أو خمس أيام أو أقل أو أكثر يعاد تقيم المصاب بالتحليل وفي حالة سلبية التحليل ينقل الي عزل أقل درجه حتي يتسع المكان لأخر مش معني كدا إن التحليل الأول كان خطأ دي عدوي يعني بتخف مش (واحمة) ستظل مدي الحياه .

ثانياً : بالنسبه للمخالطين في بداية الأمر زياده عدد المخالطين الصح نحاسب عليه لأن العالم كله قال ( حظر وليس إلتحام) وعلي الرغم من ذالك فهناك نظام للدولة أنه في حالة ظهور اَي عرض علي المخالط نقوم بعزله وعمل التحاليل المطلوبه له وتأتي النتيجة إما بالسلبي أو لا قدر الله بالإيجابي .

ثالثاً : ودا أصل الموضوع

مش معني حضرتك مش فاهم كدا تتهمني بالجهل وسوء تقدير الحالات عشان المصاب التحليل بعد كذا يوم بقي سلبي يبقي كان غلط حتي لو كدا مش أنا إلي عملت التحليل ولا أنا إلي جبتله العدوي

فين الجهل مني وفين العلم من حضرتك ..؟

لازم تعرف إن أنا صاحي عشان حضرتك تنام أنا بتعب أوي عشان حضرتك ترتاح

بتعامل مع حالات حضرتك بتخاف تكلمها في التليفون بيجيلي المريض بتعامل معاه يوم وعشرة ومش بشوف له مخلوق إلا من رحم ربي يسأل عنه إن ظل علي قيد الحياة نهتم به ونعامله افضل معامله ، يكفيه مرضه ، وإن لا قدر الله توفاة الله ، نكرمه ونصلي عليه ونشيعه

حضرتك مش موجود عشان خايف علي نفسك وأولادك

هو أنت بشر وأنا حجر

عارف يعني أيه نازل من العزل مروح لأولادي

عارف يعني أيه إبنك الصغير يفتحلك الباب ويجي عليك تبعده عنك بكل قوة وقسوة عشان خايف عليه منك

عارف يعني أيه أنت قاعد في وسط أولادك تفطر وأنا باعد ولادي عني

طب عارف لما عيل منهم بيدفي أو يعطس الفتره دي أنا ببقي عامل إزاي ، الطبيعي إن الأب هو الأمان لأولاده

حضرتك أنا أخطر إنسان علي أولادي الوقتي

طب عارف إن أنا أكتر واحد مخالط ومطلبتش يوم أحلل لأن اللي يسري عليه يسري عليك رغم تعرضك مرة واحده وتعرضي ألف مره

طب عارف أنا بكتبلك الوقتي بأي إحساس

بفضل الله تحملت انفلوانزا الطيور والخنازير وحملة ١٠٠ مليون صحة لعلاج فيروس الكبد ( c) وعزل الكورونا وإشتغلت فيهم عامل وإداري وطبيب ومدير ، عمري ما قصرت ولا توانيت في عمل تحملته وإن شاء الله وقدر لي البقاء سأكمل ما بدأت وسأظل في عملي ليس إجباراً من أحد أيا كان وليس خوفاً من أحد أيا كان ، بفضل الله عمري ماخفت ولا هخاف من مخلوق وليس من أجل مال ، الحمد لله ربنا راضيني والمال مال الله ، الكل يعلم مانتقاضاه فقط لوجه الله سبحانه وتعالي

لأني أعلم علم اليقين أن من أراد أن يحمي أهله وأبنائه فليتقي الله في عمله .

إن شاء الله دا أخر كلام هكتبه في هذا الموضوع كامل إلا مره واحده وعدت أخ فاضل قال لي أني عندما أصاب بالفيروس سيقوم بالشير علي أوسع نطاق

وأنا وعدته عندما أصاب أنا أول شخص سأذكر ذلك للجميع ليس عيباً أو عاراً

( جزاكم الله خيراً ومتعكم الله بالصحه والعافية )