أعلن مارك زوكربيرج وزوجته "بريسيلا" رقم استثمار يقدر ب75 مليون دولار لمباردة جديدة، قامت بصرفه مؤسسة تشان زوكربيرج Chan Zuckerberg Initiative (المؤسسة الخيرية اللي بتحمل إسمه هو وزوجته).

المبادرة الجديدة إسمها "ريزولف" Resolve (أو حل) من أجل الأطفال، وهي مبادرة عالمية في مجال الصحة هدفها إنقاذ حياة 100 مليون شخص بالوقاية من الأمراض الوبائية وأمراض القلب.

وأكد مارك على إن لو عاوزين نزيد من العلاج ووقاية وإدراة كل الأمراض اللي بيمر بيها أطفالنا واللي ممكن تطلع في المستقبل فعلينا إننا نكون جاهزين للأمراض الجديدة اللي بتظهر فجأة زي ما حصل في السنين الأخيرة مع أمراض زي فيروس الإيبولا وزيكا.

الكتير من البلدان معندهاش بنية تحتية تقدر تتوقع الخطر وبالتالي تمنعه قبل انتشاره، وده بيعرض حياة الملايين حوالين العالم للخطر. عشان كده المبادرة دي هتشتغل مع الحكومات حول العالم عشان تقدر تبني نظام يسهل اكتشاف الأمراض دي من بدري وبالتالي احتواءها ومنعها من الانتشار.

في نفس الوقت فيه ناس كتير بتموت من الأمراض غير المعدية زي أمراض القلب. ده كمان بيموت منها أعداد من الناس أكتر من اللي بيموتوا من الأمراض الوبائية أو القابلة للانتقال من شخص لآخر. والوقاية من أمراض القلب ممكن يبقى حلها الجذري والفعال هو تقليل الصوديوم والدهون في الأنظمة الغذائية، وكتير من التغييرات في الصحة العامة حول العالم ممكن تقطع شوط كبير في المجال ده.

كل المجهودات دي بيقوم بالإشراف عليها وإدارتها د. توم فريدن المدير الأسبق لمراكز مكافحة الأمراض بالولايات المتحدة CDC واللي ساعد في القضاء على وباء الإيبولا. وقام مارك وزوجته بريسيلا بتمويل مجهوداته لمكافحة الإيبولا. وده أثار إعجابهم لدرجة إنهم قرروا يدعموا د. فريدن في أي مبادرات قادمة هيقوم بيها بعد ما ساب مركز مكافحة الأمراض.

بتتعاون في دعم أهداف مبادرة "ريزولف" من أجل الأطفال، مؤسسات تانية مع مؤسسة مارك وزوجته: مؤسسة بيل وميليندا جيتس (Bill & Melinda Gates Foundation) وبلومبيرج للأعمال الخيرية (Bloomberg Philanthropies).

كلنا في انتظار إننا نشوف نتايج المجهودات دي للحد من الأمراض حول العالم.