دافع الفنان أحمد السقا، عن الفنانة منى زكي، بعد حملة الهجوم عليها بسبب مسلسل "تحت الوصاية"، قائلًا: "الناس بتحكم قبل ما تشوف".

وأكد خلال لقائه ببرنامج "الراديو بيضحك" الذي تقدمه الإعلامية فاطمة مصطفى بالراديو 9090: "منى زكي عاملة مسلسل رائع وأجمل حاجة إنها بصت في ورقتها وسكتت على اللي بينتقدوها". 

ولفت: "نفس اللي حصل مع منى زكي حصل معايا قبل مسرحية سيدتي الجميلة، ومسلسل حرب، بصيت في ورقتي والتوفيق بتاع ربنا".

في نفس اللقاء، كشف الفنان أحمد السقا، حقيقة مشاركته في الجزء الثاني من فيلم "صعيدي في الجامعة الأمريكية" وإنشائه قناة فضائية.

وقال أحمد السقا: "أول مرة أسمع إني خلاص هشترك في الجزء الثاني من صعيدي في الجامعة الأمريكية، أو يكون عندي قناة فضائية".

وأضاف: "لي الشرف إني أتعاون مع محمد هنيدي ومدحت العدل ومحمد العدل وسعيد حامد في جزء ثان من فيلم صعيدي في الجامعة الأمريكية، بس مفيش حاجة لحد دلوقتِ".

وتابع: "يجمعني علاقات قوية مع كل جيلي بس محمد هنيدي بالنسبة لي قصة مختلفة ولو طلب عينيَّ دلوقتِ هشيلهم واديهم له، واحنا جيل بنحب ونحترم بعض".
 

وعن حلقته في مسلسل الكبير أوي 7، علق أحمد السقا: "أحمد مكي كلمني هو وأحمد الجندي عندنا حلقة قائمة عليك هتيجي تعملها ولا لأ، فقلت لهم أنا جاي ورُحت صورت، نفادي جنني وموتني من الضحك، فيه حوار طلع ارتجالي على الهواء وأخذنا وقت في تصوير المشهد من كتر الضحك".
 

ولفت: "أنا بحب الكبير أوي، بس أتمنى لصاحبي أحمد مكي يعمل حاجة تانية بس ما يحرمناش من مسلسل الكبير".