على ورق الزيتون

واكتب على ورق الزيتون

ورخِصت يا تفاح وساويت الليمون

واللي انجرح فاق وهيسوق عليك الجنون

واترفع الحرج عن ابو عقل خفيف

وعرف ازاي يجيب فيك جون

والشبكة اتقطعت بسحر ملعون

أصل المظلوم من ربُّه يجيلُه العون

واللي سكن الصحرا شاف تعابين

لما يجوع يصطادلُه جوزين

يشوي ويقلي ويبيع الجلد بقرشين

واللي يفيض يتملَّح يتقدم للغاليين

بيبُص شمال ويبُص يمين

أيوا انت اللي عليك العين

متعشهاش دا يدوب هُمَّا يومين

والراس تدلدل ف صف المدبوحين

ما انت ضحية وانا ضحية

بس الفرق طبخوك وحطولك تقلية

أهو تنفع كم يوم

وأمّٓا ريحتك تطلع وتحمض تترمي

ولا يبقالك قيمة ف حتة وتنزوي

ما انا حذّٓرتَك مرضيتش تفوق م النوم

عليك والله أنا مش بلوم

عارفة انك مِتساق واللي زيَّك مركونين بالكوم

الرَّك ع الأصل والسيرة والفصل

والتعليم والدرس ما انت ليهم همزة وصل

ما هو مفيش أساس ولا تربيَّة

ولا عُمرَك اتحمِّلت المسؤولية

درس محترم خَدتُه ومِش بنكِر حصل

ما هو مِش كل من دق الباب وبيَّ اتَّصل

يتفتحلُه السكك والأبواب

كان لازم صد بمية قفل

دا زمنَّا مفيش فيه حاجة اسمها أحباب

غلطانة وكان واجب أرُد الباب

كُنت اقطع عِرق واسيَّح دم

ولا كُنت آخُد وأدي ولا كلمة ولا جواب

لكني عشان محترمة قابلت بترحاب

وكانت النتيجة يا أسفي وخيبتي خراب

وشالوا م الأرض ورموا ف عيني تراب

لكن اطَّمِنوا خلاص فُقت

صحيح بعد صدمة وواقعة

لكن عن الطيبة أنا تُبت

وعن سوادكوا وغلِّكوا بعِدت

قال بيقولوا بياعة!!

يقتلوا القتيل وأنا الخدَّاعة

حقكوا عليَّ أنا اللي بمية وش ولون

انا الغولة الفزَّاعة

انا اللي سيبت حقي بإيدي

وعملت فيها شجاعة

وع الأصل دَوَّر تلاقي لقبكوا وضاعة

افتكروني نمت وليهُم استسلمت

الأسود م المُلك مِتمَكِّنَة

دي سُنة الغابة وبالشرع قدرت

قاعدين عاملينها محزنة

يخططوا يوقعوا سنانهم ومَسكنة

يتمضمضوا بسيرتي

وأنا أوَضِّيهُم بهيبتي

أعَلِّم عليهم بالأختام

وأشاور وأقول حاسبوا اللئام

معدومي الضمير آكلي لحوم البشر والعظام

لابسلي بدلة كاراتيه وعامللي فيها فاندام

روح اتغطى بخيبتك شد اللحاف ونام

قرصين مُسكِّن يخففوا خرابيش الأيام

وأقوم من تاني وأغيظ الشمتان

وعندي الحفلة على كام خروف وشوية جديان

ملكش حجة ومفيش اعتذار

ده انت الطبق الرئيسي ولا ليك عليَّ حلفان

ده الكره معشش جوَّه ف قلبي

مستني دبحك من زمان

ومهما هتهرب هتتجاب

وهنقدم معاك حبة مُقبِّلات

وعشان طعمك زفر محتاجلُه توابل

وتغلي ف مية والشوربة تترمي مِش هتتاكل

ومين هيجيلوا نفس يدوق قاتل

غير اللي شبهُه يمحوا الدليل

تموت عمايلهُم وعمايل وحقارة الفاجر

ربَّك قادر رَبَّك قادر