الأدب
مسرحية حبنا
أنا حافظة لك
كل المشاهد بالصور
تقدر تعيد لك
مسرحية حبنا
فاسمح لي نفتح ف الستار
ونعد تاني للحوار
ونعيد حروف التهتهة
منا كنت عمية وقتها
سحباني دقة من مفيش
هاكتبها علي صورة الافيش
أكبر غباوة ممكنة
فضيلي كل الامكنة
مش عايزة اسمع اي صوت
انا قلت من فضلك سكوت
انت هنا وقلبي هنا
وليالي ياما سهرتها
أخمد في نار الإنتظار
والذكريات المهملة
الحب كان ف الاولة
بذرة وفا
مانا كنت فاكراك الدفا
وقت الجليد
اقعد هناااك اقعد بعيد
اياك تقولي جملتك
"من تاني نبدأمن جديد "
انا كنت باغزل م الامل توب فرحنا
باكتم في جرحي اللي اكتمل
بعد الغياب
باقتل في شوقي اللي انخدع
طعم العذاب
باكدب علي ضي القمر
وباصحي حلمي اللي انتحر
مني اكتئاب
غميت عيون الانسحاب عن كوكبك
وف كل حرف انا باكتبك
اهل ووطن
كل المداين والسكن
كل الخلايق والبشر
حتي الجبال
انا عشت اخطي شايلة حبك
بره اسوار المحال
غيرت كل الفلسفات
غيرت ظن الشك
من طول الساعات
غيرت قوانين الاحتمال
الا احتمال انك تحس بدمعتي
فوق الخدود
انك تعود
معرفش قلبي المستحيل
الا في لحظة صدمتك
ضيعت عمري في سكتك
موت رووح
اكتر ما كنت تحب نفسك
حبتك
ابعد ما تحلم والخيال
ما انا كنت شارطة حضرتك
الكحلة في عيون الكمال
بطلت اقول انك ملك
بطلت ادور من تاني
وف نفس الفلك
دلوقتي قلبي اللي انفصل
واللي امتلك
قلبي اللي حبك وانخدع
قلبي اللي علمته الوجع
قلبي اللي داب طول السنين
مسكين يوشوش في الودع
قلبي اللي كفن في انتظارك
من زمن
كان ف انتظار جنة عدن
دخلته نارك يتحرق
قلبي خلاص دفع التمن
والوقت فات
خلصت دقايق الامتحان
بعد استعاذة م الشيطان
فانا قلبي بيقولك كمان
يا شهريااار
نزل الستار
///////////////////////////////
مسرحية حب""" سميرة محمودي
