فُووووق ولّٓا انت ناسي

نُواحكوا والبُكا مِ الألم

أنا الجندي المقاتل

أنا إللي رفعت العلم

أنا ابن مصر الأمل

أنا الحُر الشهيد

رافع شعار العزة

شايل كرامتي بكف الإيد

واهم لما تفكّٓر إني بأرضي هضحي

أنا اللي رافع راسي الشامخ

بكُل مواقفي زي الشمس أنا واضح

انتصاراتي أنا هٓحيِي

وعن أمجادي أنا بحكي

من نيلنا أنا شارب وبيجري ف دمي

عندي عِزوة خالي وعمي لكن مصر دي أمي

كل شبر فيكِ يا سينا هبني وأعٓمَّر

هرفع الأذان بصوتي أتشاهد وأكٓبَّر

ياللي دمك أزرق بارد

قوم واقرا التاريخ

احنا اللي نهينا الأسطورة

دا انتوا عصابة موتورة

سيرتكوا فِ القرآن مذكورة

دا مش سيناريو وفيلم وتأليف

إحنا اللي عبرنا القناة وهٓدِّينا بارليف

ثغرة الدفرسوار !

وقال إيه فاكرين هيحققوا انتصار !!

بيساعدوك الخَوَنَة ومعاهم بتتعاهد

إس آر واحد وسبعين

ودبابات سنتوريون وشوية صواريخ

ودَيَّان بيعيَّط محاولة فاشلة وجرفِتها الريح

إحنا اللي حاربنا ف حطين

وبطلنا صلاح الدين

وراح فِ الوبا دَيَّان وصحابُه أهو راح

قهرُه جيشنا والمقاومة الشعبية

والصاعقة رعبِتهُم وخسارة جسيمة

خافوا البُعدَة جِريوا وقالوا أشباح

أصبحوا ف النُّص رهينة

السادات قالها مغامرتهم طايشة

صدَق والله حيطتهُم بايشة

النصر كان لينا حليف

أنا إللي كلمتي على رقابكم سيف

وسلاحي لأرواحكم بتَّار

عارف إنَّك متغاظ مُنهار

وهزيمة وفضيحة بجلاجل اتنين الظهر

ونار حرقتكوا فِ عِز النهار

وفي يوم مطلعتلوش شمس عليكوا

انْهَد العالم حواليكوا

بعد ما أخدنا القرار

نظفنا حبة تُراب بشوَيِّة ميَّة

أنا الأسد الجسور البطل المغوار

ساتر تُرابي إيه يا فرفور

انت مُجَرَّد صفر بدون قيمة

مش فاهمين على إيه مغرور

عساكرك مش فالحين غير فِ الرقص

خلاعة وضاعة وهَجس

إعلامك واقع وحكاوي فاضية

أمَّا انا لما أحكي هجيبك بالقاضيَة

اخواتي أنا مش سايبهُم

جنبي وف أرضهُم هساعدهُم

تضرب تقصِف ربنا حافظهم

شهيدنا وشهيدهُم ف الجنة حبايب

احنا مِلَّة واحدة وده عن ذهنك غايب

تصَوَّت تأفلِم ظهرت حقيقتك للكل

وعليك خلاص علامة مجرم مِتعَلِّم

شكلَك بقى بايخ

جبان بتلَوِّش دايِخ

إلحق عندك إللي ف الصف بيهرب

لأرضي حدود هاكسر رجل إللي يقرَّب

وأدفن ببيادتي إللي يفكَّر يهَوِّب

لا بر ولا بحر ولا جو

أنا صاحيلك أنا العَو

أصحاب الأرض

دي شرَفهُم والعَرض

صامدين صابرين بأمر الله

مؤمنين بالنصر وآخرتكوا تتخَبُّوا

ورا شجرة يا حول الله

وطعامكم من زقُّوم

وهتدوقوا المُر بجرعة وتطعيم ف الحلقوم

إحنا حدوتة مصرية

أرض النخيل والزيتون عندنا محكية

بدَم الشُّهدا مَرويَّة

موهوم مفزوع بتزوم

لو عَدِّيت جيشنا مش هتجيب مُنتهاه

مؤيدين بجُند من عند الله

إحنا العزيمة والإرادة

إحنا العراقة والأصالة

لو مش فاهم إسمع الإعادة

ونقول مِ الأول

عَ الأصل دَوَّر

مفَكَّر لما تستوطن هتعَمَّر!

لما تغتصب وتحتل وتسرق هتتقدَّر!

احنا عُصبة واحدة شعب واحد

هتاخد على دماغك وتتكدَّر

إحنا الليل وآخرُه الفجر

ونسور بتحرُس ظهر وعصر

سبحة وملضومة بتسبيح

أما انت حجارة من غير عقل وشوية صفيح

بتتشطَّر ع الضُعفا العُزَّل

وعاملي ديك بيصيح

رايح فين اسمع لكلامي

أنا ربنا كَرَّمني وف الجنة هينعمني

وعلى العدو هينصرني

إنما انت من رحمتُه مطرود

دي كُتُب مُقدَّسة وقرآن وعهود

هشرب عسل ولبن م النهر

وانت هتموت م القهر

أنا حبيبي محمد الرسول

وانت حليفك شيطان أفول

أنا عنوان الصلابة

عندي القوة دي شيمة

وف رقبتي قلادة

وأمي للرجال ولَّادة

حاربت مغول تتار هكسوس

وفي ديني دي عبادة

قضيت ع الإرهاب

بضربة معلِّم لا يهاب

من رفح أنا باعت للغزَّاوي جواب

بيني وبينه مفيش حجاب

لا هتقدر تمنعني ولا تطردُه برَّه الباب

أرضُه والبيت بيتُه

وصَّاني بنفسُه وصيتُه

خليني ف أرضي أنا مش هتهجَّر

هزرع ليمون وزيتون هعصُر

ده شجر متوَرَّث أبًّا عن جد

وأنا صاحب مكان زيَّك

وأمي وبنتي وأختي وزوجتي

ميطلعوش م الدار ده شرف وعرض

رفح والعريش سينا والسويس والاسماعيلية

دول عرايس مصرية

إيديهم بتراب مصر محَنِّيَّة

بيتباهوا بالتوب الأخضر وجدايل دهبيَّة

وف كل مدينة وشارع اخوات ليَّه

وقت الشدة إديهُم ف إديَّه

وأنا على أهبة الاستعداد

إللي يفكَّر يلمس شعرة ف بلدي هيتباد

ربنا يحفظنا م الحاقدين والحُساد

وكل من يسأل عنا ميلقلناش أنداد