هيّ دي الحياه

.................

لما قلبي ينادي قلبك

يبقى زي الطير جناحه

ف السما مطلوق وفارد

حاضن الدنيا بلقاه

لو لساني يغنّي إسمِك

ليلي بيشقشق صباحه

والنهار بيطل فارد

نوره أبعد من مداه

وامّا حضني ف يوم يضمِّك

قلبي يخلص من جراحه

والغرام بيجيني مادد

جايب الأفراح معاه

وامّا اعيش يا حبيبتي جنبك

هيّ دي تبقى الحياه

كل شئ له منتهاه

إلا حبي ليكي باقي

نظرتي لحظة ما اشوفك

ضمّة القلب لحروفك

لوعتي وقت اشتياقي

دانتي لمسه من إيديكي

وقت جرحي تكون دوايا

وانتي وقت البُعد دائي

الحياه ف الشوق جناين

وانتي أحلا ورده فيهم

شئ طبيعي قلبي يقعد

عمره جنبك يبقى ساقي

دا الغرام هوّ ابتلائي

قلبي راضي بيه وعايزه

فاتح الأحضان وواخده

من دفاه بيزيد غُناه

وامّا اعيش يا حبيبتي جنبك

هيّ دي تبقى الحياه

إفرديلي الشوق مصلّى

قلبي عابد

قلبي عاكف

وان لقيت الصبح ولّى

واللا كان النور معاند

عمر قلبي ما يبقى خايف

طول ما نورِك بين وريده

يبقى عندي الضي زايد

يعني بيكي ح ابقى شايف

كل سكّه ح امشي فيها

زي فارس فوق حصانه

حتى لو ف طريق مُخالف

وان لقيت الغيمه جيّه

والرياح صبحت قويّه

والمطر م الغيمه زاحف

قلبي من أشواقه عارف

إنُّه فيكي ح يستخبّى

والدفا ح يجيلُه يجري

يحضنه من عِطر نَفَسك

ان صادفني الخوف ح اجيلك

أرتمي على كف إيدك

والأكيد ح اشعر ساعتها

بالأمان من لمس كفّك

طول ما قلبي يا قلبي حسِّك

يبقى كوني بحاله جنّه

والهوى مفتوح مداه

وامّا اعيش يا حبيبتي جنبك

هيّ دي ..

تبقى الحياه

الشاعر محمد ابو العبادى