ثقافه وفنون
سوق العصر
ف سوق العصر
فارشه ملاية بتتاجر
ف أحلامي
وماليه الشيشة من دمي
وبتكركر بصوت همي
وحاطه الفحم م النني
_وعاملة_اللي_شرياني_
وبتنادي بعلو الصووووت
يا مين عايز شباب للمووت
شباب مفطوم على الجبروت
صنيعة مجد حكامي
شباب طازة على الفطرة
ماعندوش حلم ولا بكرة
ومقتولة ف عنيه الفكرة
شباب من صغره بيعاني
_شباب_تايه_مالوش_عنوان_
رخيص دمه وبالمجان
وخد ع الشاب طفل كمان
مالوهش مكان ف أحضاني
وقف واحد غريب الشكل والمنظر
يقلب ف الشباب يضحك وبيهزر
وقال السعر مهما يكون
هازيد اكتر
ومهما ادفع انا الكسبان
مافيش بعد الشباب غالي
وشال الشيلة واتوكل
وفض السوق على العواجيز
وخلو الحلم حدوته
بدم شبابها ملتوته
سابت ملايتها مفرودة
_ورايحة_تجيب_شباب_تاني_
وسوق ورا سوق وبتاجر
وكل أخواتها بياعة
هانبني إزاي بلد تاني
حقوق العمر متباعة
بيغلي الرز والسكر
وانا اللي رخيص ..ف أوطاني. .
_يا_جيل_من_صغره_بيعاني_
_نصر_جابر_