الأدب
ماتساويش
ماتساويش ...
الدنيا ف بُعدِك ...
ماتساويش
ولا قادر انسى ،
ولا قادر اقسى ،
ولا قادر اعيش
ما تساويش
الفرْح غاب ،
والقلب داب
وكل العذاب ..
أناجي طيفِك ...
ماتردّيش
***
ماتحاوليش ...
تمسَحي الذكرى
تِقتِلي بُكره
بُكره جاي
إزاي مايجيش ؟؟
انا أمَلي فيه
مُش ح يموت ،
و ف يوم ح الاقيه
ف قلب الموت ،
ولابد يعيش ..
ماتحاوليش
أنا ح انسى جروحي ،
ومهما تروحي
تزيدي جراح ،
ومش بارتاح ،
ومابانساكيش
ماتحاوليش
دُنياي إنتي ...
مهما عملتي،
والدنيا بَعدِك ..
ماتساويش
***
الشمس ..
عيونِك ،
والسما ...
جُفُونِك ،
وح افضَل أصونِك
بُعدِك مرار ،
وانا محتار
أصون وِدِّك ..
مابتودِّيش
غصب عَنّي ،
ومش قادر
يمكن تِحِنّي
وانا صابِر ،
وخايف صبري ..
مايكفّيش
نقَضتي عهودِك
نسيتي وعودِك
واخترتي هجري
ماتِنكريش
أنا حُبّك هزمني ،
وح يبقى ملازِمني
سواء رِضيتي ..
أو مارضيتيش
ده حُكم القَدر
أحِب القمر ،
ومايحبنيش
مش بإيدِي ..
يافَرَحي ،وعيدي
عُودي ، وعِيدِي
هوّه انا من غيرِك ..
أقدَر أعيش ؟؟؟؟؟
ما تِستغرَبيش ...
دا الدُنيا ف بُعدِك ..
ماتساويش ...
..................
الشاعر رفعت ابوالعلا
