الأدب
' مع أنى '
مع أنى مانزلتش .. للدنيا من بطنك
مع أنى ماشربتش .. ولا نقطة من لبنك
مع أنى ماحبتشى .. من صغرى على رملك
لكنى ليه حاسه .. أنى اكيد بنتك ؟؟
***
يمكن عشان حبك .. ساكن سنين عمرى ؟؟
يمكن عشان همك .. ربانى من صغرى ؟؟
***
كانت سنين مرة .. ذكراها يكوينى
الشعر شاب ف الراس .. سجنوكى ..
فوتينى
ومليت لك الكراس .. بدموعى وأنينى
وشربت مر الكاس .. من عمرى وسنينى
***
وف عشره من رمضان .. بسواعد الشجعان
عادت طيور الخير .. للمغنى والألحان
رفرف علم شوقك .. وأخدنى بالأحضان
***
و تفوت سنين و سنين لساكى فى الحرمان
غصن الزتون تايه .. محتار بقاله زمان
مابين طمى نيلى .. ورملك العطشان
تنساب على أرضك .. خريطة الأحلام
تحكى تاريخ امة .. عاشت مآسى كتير
وانزاحت الغمة .. والباقى ع التعمير
***
لكن يكتفنا .. حدة وصراخ كداب
والجهل ينقلنا .. م الحلم للإرهاب
تهرب طيور الخير .. من جو كله ضباب
***
شيفاكى يا أمى .. بتعاندى مع خوفك
صابرة وحساكى .. بتئنى ف سكوتك
بتحاولى تبتسمى .. وتغنى أحزانك
الغربة سكنتنى .. على صدر شطآنك
ورمانى سهم الخوف .. وأنا جوه أحضانك
يا غربة ليه بنعود .. منك .. لأوطانك
***
ولأنى عشقاكى .. من قبل ما أشوفك
ولأنى منقوشة .. كالوشم ف كفوفك
صبحت خيوط عمرى .. مجدولة من صوفك
***
مع أنى ماأكلتش .. ولا تمرة من نخلك
مع أنى ماسكنتش .. ولا عشة فوق رملك
مع أنى مامسكتش .. سلاح يصون عرضك
لكنى ليه حاسه .. أنى أكيد بنتك ؟؟
أنا أكيد بنتك .. أنا أكيد بنتك
***
إيمان فريد معاذ
