ثقافه وفنون
ناس و ناس
علشان بنسعى للحلال
بنعيش حياة المغربة
بنشد ع الكتف الرحال
نرجو من الله الهبة
والرزق لو كان ف الجبال
نوصلوا لو بالمركبة
والمركبة يعني السفينة الذاهبة
لبلاد كريمة وطيبة
وبلاد كتيرة مرعبة
وبلاد نشوفها من بعييييد
وبلاد نشوفها قريبة
ناخد من الزمن الفراق
والرحلة شاقة ومتعبة
لما يحين وقت الرجوع
ويحين معاه وقت اللقا
إحساس رهيب بعد العناء
نحضن حبايبنا برضا
وجه المعاد
رحلتنا خلصت بالندا
وجواز رجوعنا للوطن
جوة القلوب سامع غنا
وإتجمعت جوة السفينة ناس كتير
الكل مرتاح الضمير
راجعين لاهالينا بغنا
وﻻ يسألوا تاني اللئيم
ونعيش معاهم حتى لو لحظة هنا
وسفينة طلعت بالسلام
وعليها من ربي السلام
عبارة منصوبة الزمام
بس الحكاية مش كدة
أصل الحكاية ناس وناس
ناس همها تملى الكروش
وإن أكلت ناس للقروش
كل المهم الأرصدة
تكتر وتعلا في البنوك
لو كان بخير او مفسدة
مايهمهاش المقصدة
ناس تانية تايهين في الحياة
دايماً أسارى المصيدة
ياهل ترى العيب في الأساس
والا عشان إبن الحلال حظه كدة
وإبن الحرام طبعه كدة
ومابين كدة ومابين كدة
فيه ناس وناس بالشكل ده
والشكل ده
والفرق واضح للعيون
تحت الجفون بتبان ملامح طيبين
تحت الجفون يتعرفوا تجار الربا***...................................
بقالي سنين بقول ازاى وايه القصه
ومش معقول فى يوم ننسى اللي كانوا اخوات
وياما سألت مش لاقي الجواب لسه
فى حق وتاه مابين فسده وبين براءات
ومين مسؤول عن الكارثه
دى مش سهله
دى حاجه كبيره مستاهله ماهيش رويات
وﻻ خيالات....
وﻻ احلام ومنسيه فى عز الليل
دى خلق غلابه مرميه فى جو زليل
وﻻ بتميل... وﻻبتميل
وكل حياتها مبنية على التأويل
ولو غرقوا لو اتحرقو لو انكسروا
ماتفرقشي مع السادة ده هم تقيل
ولا بنسمع سوى التطبيل
.سوى التضليل
وتتغير ردود الفعل وف جلسة
ده لو كان اللي راح واحد من الكبارات.....
وايه الاصل لازم نعرف الموضوع
لابد نقلب الماضى لابد رجوع
ونعرف مين ظلم عايش
ومين بالظلم مات مخدوع
ونتكلم بصوت عالى يكون مسموع
ونفهم كل شئ بوضوح ولو مرة
ولا نهرب من الازمات.....
لابد نحاسب الجانى ونعرف صاحب الخسه
وناخد تار حبايب غرقو واتعدوا من الاموات
_الشاعر_موسى_كامل_موسى
_شاعر_الإنسانية
