أكدت والدة الدكتورة ياسمين ضحية زوجها في الدقهلية أنها كانت تعتبر زوج ابنتها معيد الأسنان ابنها الثالث وليس زوجا لابنتها الوحيدة

«عندى ولدين وبنت واحدة وكنت أعتبر القاتل ده ابنى الثالث وكنت أقول له يا محمود أنا عندى 3 أولاد مش ولدين دلوقتى وياسمين أمانة في رقبتك حافظ عليها لأنها بنتى الوحيدة لكنه خان الأمانة وقتلها الغدار الخاين بـ 17 طعنة أمام أولادها ولم يرحم بكاء الطفلة اللى عندها 5 شهور».

وأضافت الأم في بث مباشر للمصرى اليوم: «كنت بأزور بنتى أنا وأخوتها وأخوالها وعمها في العيد يوم الواقعة قبل الجريمة بساعات واشتكت أن في بينهم مشاكل كالعادة علشان المصاريف وقلت لها متزعليش نفسك إحنا هنجيب لك كل اللى انتى عايزاه وربنا يهديه لأنه كان بخيل عليها وعلى الأولاد وعلشان كده احنا كنا بنساعدها حتى في ميلاد البنت كانت داخلة الحضانة واحنا اللى دفعنا لها 10 آلاف جنيه وأخدنا ابن من أولادهم الثلاثة علشان نربيه في بيتنا علشان نخفف عنه وللأسف المجرم لم يراعى وجود أطفاله وهو بيقتلها حتى ابنه ياسين تعبان من وقت الجريمة لأنه شاف أمه بتتقتل وكل شوية يصرخ ويقول بابا السكينة ماما».

وتابعت: «اسألوا المجرم ده احنا كنا بنعامله ازاى وأبوها الله يرحمه قاله يا محمود انت ابننا أهم حاجة ياسمين في أمانة عندك صونها وخلى بالك منها لكنه المجرم قتلها وغدر بها وبنا وكمان طعنها 17 طعنة ليه هي عملت ايه اسألوه كده ليه ايه ذنب ياسمين علشان تموت بالشكل البشع ده انا عايزة حقى منه عايزاه يتعدم ألف مرة».

وانهارت وهى تقول: «لوبنتى عملت حاجة كان جابها لنا كان طلقها وسابها تربى أولادها وكنا هنشيلها ونشيلهم في عنينا».