ثقافه وفنون
كلام مقلوب
مولود جديد اسمى .....مالوهشى حروف
عيونى لونها تقريبا.........مهوش مألوف
ولا اعرف يعنى ايه دنيا
ولا اعرف خوف
انا اللى جوه حضن الموت ولاهوب
ولا فكر بقلبى يطوف
انا كل اللى يعنينى ..صبحت باشوف
بقي عندى من الإحساس كذا حاسة
وباتحدى كمان لسه
هاكون اجمل
على فرض انى كنت جميل
و إنى بدأت استحمل
بدأت أميل
لأنى ابقى بروح خاصة
وآآآآآه لو ينفع اتحول لروح جبريل
وابقى ملاك
انا أصلى ماشوفتش مره نفسى هناك
ولما قابلتنى صدفة ما شبهتش
ولا قولتش دا يطلع مين
ولا وقع المثل فيا ويخلق م الشبه مضامين
انا بقى مين ؟
انا الجاهل وباعترف انى استاهل
أروح النار
انا اللى باصلّى بالصدفة واحيانا
باصلى هزار
وانا اللى تمللى باتفرعن عشان أرعن
وفاكر انى م الثوار
انا اسف قوى لتراب انا كنت النجس جواه
لأنى حمار ......ولابس بدلة الأستاذ
وحدفت القلوب بالطوب وانا قلبى
إزاز ف إزاز
فانقطة........ والكلام مقلوب
ومن أول ما قالوا يا حب
من أول ما قالوا يا شعر
من اول ما قالوا فكر
من أول ما قالوا يا مصر
من أول ما قالوا يادوب
هاعلّم قلبى من أول مشاعر واء
هاجيب له مرضعة خصوصى
تكون فى الشكل يوكابد
تكون ف الحلم سعدية
وشرفها أخو الشيماء
وصلى الله على قلبى
إذا ما كنت فى دربه
إذا ماكنت فى قربه
إذا ما كنت فى حربه شهيد
أو سيد الشهداء
يجوز ابقى فى يوم شاعر بشر مرسل
لنشر الحب فى الأنحاء
وينقال ان انا شاعر............. وجايز
آخر الشعراء
يموت ابو جهل فى قصيدة
وتتبعنى خطى أسماء
من اللى علمونى الشعر
واللى خففوا لى الداء
من اللى وصلونى لبر
واللى صححوا أخطاء
وبعد الشر على قلبى
رجعلى سليم
لكن برضو بشر خالص
بشر من صلب ابوه ادم
فلازم يبقى بارّ بابوه
يكون يعنى ولد خطّاااء
فامن تانى نقول تانى نقول تانى ولا يجراش
انا راجع يا دوب من حتة معرفهاش
وعيشت هناك كذا ساعة بلا جتة
ونفسى افهم ونفسى اسأل والاقى جواب
و كنا ف ايها حتة
وروحى ازاى تبات بره
من احداشر لغاية يعنى قول ستة
انا كان فين ؟
ومين خد روحى علقها ف شماعة
وضيعها كذا ساعة
ورجعها ف نفس الجسم لو يفهم
يجوز يعمل لها إشاعة نشوفها نعرف احنا منين
طبيب تخدير...طبيب جراح
ملايكة ولاّ دول شياطين ؟
ابا يعقوب هل تسمح
ساعة لما تخش القلب وبتفتح
بتعمل ايه بقى ف الروح
بتركنها على رف الزمن يعنى
بتوجعنى.... بتسمعنى .... بتتبعنى منين ما بروح
ابا يعقوب هل الأرواح مقاس واحد بلد واحد
وليه النفس منها كتير
ابا يعقوب انا عارف بإنى فى السؤال مذنب
لكن نفسى بجد اتوب
ونفسى ف جسم مش من شلة امبارح
يكون القلب بالمقلوب
قصيده: للشاعر حمدى موسى
