الأدب
... ' الإنتظار ' ...
،،،،،،،،،،(الإنتظار)،،،،،،،،،
لا انتم كذابين
وهزاركم كله طين
صح انتوا بتكذبوا
وباين في العينين
حبيبي كان معايه
وختام كلامنا آيه
ماتفوقوا يا ناس معايه
حبيبي جاي يومين
مستني زمايله ترجع
وصعب في يوم هتخدع
في إجازته مش بتمنع
وربي له أمين
حبيبي قال ناديني
بسلاح ديما حاميني
لو تندهي هتلاقيني
قوام بين الإيدين
ولسه الصوت في ودني
بكلام نايم في حضني
صعب يا ناس يسيبني
لو كان لو حتى فين
جايين تقول لي مات
في جيشه وف ثبات
طاب إيه ذنب البنات
أيتام طول السنين
لو كنتم تعرفوه
وف سيرته تكشفوه
او حتى تشوفوا أبوه
هيموت من الحنين
هتقولوا إيه لأمه
راجع لك يوم في دمه
في هدومه يادوب تشمه
والباقي منه فين
يا زمن بالقسوة مالك
الحزن ليه شعارك
معوج تملي حالك
وتكفن في الكمين
لا انتم كذابين
وهزاركم كله طين
حبيبي لسه عايش
هيجي لنا في اي حين
،،،،،،،،،،،(شعر)،،،،،،،،،،،،،،،
عبدالله السايح
