قالت الفنانة حنان مطاوع:"رفضت دوري في مسلسل سره الباتع، في البداية من أجل تنظيم الوقت ولارتباطي بأعمال أخرى".

وأضافت خلال لقائها ببرنامج "مساء دي ام سي" الذي يقدمه الإعلامي رامي رضوان بقناة "دي ام سي":"انبسطت جدا بمسلسل سره الباتع لما خالد يوسف كلمني، لكن قلت له قبل ما تحكيلي أي حاجة المكالمة على راسي من فوق بس أنا بحضر لمسلسل اسمه كفر العميان وهو متعملش فأنا بحضرله ومش هعرف ادخل في عملين، فسامحني فقال لي انتي بكرة فين يا حنان قلت له في البيت، فقاللي بكرة 9 الصبح انتي وجوزك تعزميني على فطار فقلت له تنور انت بتفطر إيه فقال لي فول وطعمية، وجه وفعلا ونورنا في البيت وحكا الحدوتة وطلعت رائعة وحسيت بروح النضال وكل المصريين متيمين بالأرض، واقنعني بالمشاركة في العمل".
 

وتابعت حنان مطاوع:"دخلت وصورت دور صافية في مسلسل سره الباتع، والمسلسل بتاعي كفر العميان، فضل يتأجل لحد لما متعملش خالص، وقبل رمضان بشهرين عملت وجوه سخية".

واستطردت:"نجاح مسلسل سره الباتع، كان فوق خيالي ومكنش في أحلامي انه ينجح كده، هو عمل ضخم ولي الشرف اني من ضمن فريق العمل".

في تصريحات سابقة، قالت الفنانة حنان مطاوع: "أنا  من الشخصيات اللى بتفكر كويس قبل ما ترد وبحس اني مبقصدش ألبس قناع ولكن ممكن ألبسه غصب عني في التعامل مع الناس".

وأضافت خلال لقائها ببرنامج "أنا والقناع" المذاع علي قناة "الحياة": "أنا شخصية خجولة جدا ومكنتش أتخيل أبدا وإلى الآن أني تسلط على الأضواء، أنا بخاف الأضواء على عكس ماما سهير المرشدي لو داخلين مسرح تحب تقعد في الصف الأول في المكان المتميز أيا كان أنا العكس تمام بحب اقعد ورا علشان اتأمل الأشياء".
 

وتابعت حنان مطاوع: "أنا تركيبة مش شبه ماما سهير المرشدي ولا بابا كرم مطاوع، مش تركيبة النجم أو الباحث عن الأضواء، أنا تركيبة فنانة وبخاف من الأضواء لأنها بتجنن البني آدم وبخاف من انتهاك الخصوصية لأني أؤمن جدا بالخصوصية، مبحبش عالم الأضواء لكن الفن بحبه جدا".