الأدب
... ' نور حياتي ' ...
بنتي وحبيبتي ونور حياتي
هي أختي وصاحبتي
هي أنيسة وحدتي
ومين غيرها يحن علي
هي دوايا ف غربتي
ولو حبيت أفضفض
أجري عليها أحكيلها
ع إللي فرحني ع إللي زعلني
دموعي لو نزلت بإديها تمسحها
كتير والله بتتحملني
هي أملي ف بكره
هي شمس سمايا
أسجد وليها دعايا
هي عمري إللي جاي
على رقتها يعزف ناي
لو وقعت ف يوم تقومني
بكلمة منها تسندني
هتاكلي يا مامي
يالا قومي هاكل معاكي
يا لا عشان تاخدي دواكي
قومي عشان هحكيلك حاجة
أنا لرأيِك محتاجة
النهارده انا فرحانة
أنا شفت دنيا جديدة
وسط عيلة وسط لمة صُحاب
اتحدينا الصعاب
وهنرسم بالألوان
قمر ينوََر ويبان
هيحكي حكاية عايشة جوانا
هيقول ازاي صبرنا
ازاي تعبنا ازاي حِلمنا
إزاي حققنا آمالنا
خلاص فرح واتفتح القلب
الدليل أهو لبست الروب والكاب
اتخرجت خلاص م الجامعة
إوعي تفِر من عينِك دَمعة
ابتسامة وشِّك تجمعنا
وحضنِك عارفة أنا وأختي هَيْسَعنا
أيوا حقيقي بجد ندى عمري
ومهما يعدي الوقت يستاهل صبري
أنا كنت بحضَّر ورد من بدري
وتاج أرفعه على راسي
وأقول بنتي دي عزي وفخري
أصلي أنا عارفة هتكون فرحة كبيرة
والناس هتشاور عليكي أميرة
ويقولوا إنك بالنجاح جديرة
هوصيكي وصية لما تبقي أم افتكريها
الزرعة لازم تسقيها
عشان تعلا ويخضَر ورقها
وفروعها تزيد وتعمل ضُلِّيلة
وشوية شوية تجني ثمرها
والمطر ينزل يرويها
وتفَتَّح زهرة جميلة
