ومن بين كل الصور

حبة صور ظهروا قصادي

أنا دعيت لكن ما ناديتش ذكرياتي

شريط طويل وسنين عليَّ بتنادي

وماسكة روحي في إيدي

وعقلي كان بيهاتي

كل ساعة ويوم كانت صاعقة ف حياتي

زي فيلم دراما طويل

زي كآبة غراب هزيل

زي نجوم انطفت ف عتمة ليل

زي غصة ف حلقي وصهيل

الخيل كان بيبكي ويقول تراتيل

وبوم كان يصرخ وسط الريح

كان موت بيعيش جوايا وديك بيصيح

قالي وقتك خلص وكان معايا صريح

مصدقتوش حدِّفتُه بطوب وقلبي جريح

وقعت ف أرضي دايخة

ولعبة اتلعب بيَّ كانت نكتة وبايخة

قالوا اسمها حياة ودنيا وكاس دايرة

تفكيرهم كان عقيم وأتاريني ف دنيتهم زايرة

لا أنا منهم ولا هما شبهي

لكن كان نصيب وهدَّاف وعِرِف يِصيب

أغبى حاجة فيه إنُّه ربط روحه بطيفي

كان هدفُه يرضي غروره ويحكي عن زيفي

غِلُّه أعمى ونقطة ضعفُه يشوف خريفي

لقاني جذر امتد والنجاح وليفي

أصل اللي حفر الحفرة حفرها كبيرة

وبكل قوتُه عشان يتصَدَّق

أَلِّف حدوتة وقعد يكدِب

وحواليه سقفوا وشجعوه

وعن غلطُه ما حاولوا يرجَّعوه

وكمان جابوا سهامهم وساعدوه

كنت زي نخيل أعزل

ف وسط بحر رمال

كنت بغرق أمِدِّلًه إديا

وأقول أكيد هيشدني هقاوم واتحمِّل

مكنتش أعرف مات الضمير جواه

وإن مش هو نفس الروح

دي شياطين غوياه

ووقع العزيز ف جحر ديابه

آه يا ولداه آه يا ولداه

وتستمر الحكاية ويكتروا الضحايا

وبعزم ما فيهم يصرخوا

منهم لله قتلوا فينا الحياة

قتلوا فينا الحياة