الأدب
أنا كنت فين ؟؟
أنا كنت فين ؟؟
********
هل الهلال
زى عادته .. كل عام
هللت كل المساجد .. بالأذان
تدعى العباد ..
للصيام .. و الاعتصام
و تعالوا نبداء ..
بالتراويح .. و القيام
واستعد الطيبين الميسورين
لمد موائد الرحمن
والصدقة طلعت ..
بعد غيبة .. م الجيوب
تمسح .. ملايين الذنوب
كُلِنا .. فى الشهر ده ..
عاوزين .. نتوب
عن المعاصى .. و الحرام
و نمد أيدنا .. للكتاب
ع الرف كان .. أو ف الدولاب
نقراه .. و نتسابق أليه
واليوم .. و أنا باجري عليه
سمعته .. بيقوللى بأساه :
يامسلم .. ياعبد الله
ياللى تايه ف الحياة
كنت غايب عنى فين ؟؟
قبل ما تقرا سطورى
عاوز أقول لك كلمتين
أنت عارف ..
أنا .. أبقى مين ؟؟
أنا كتابك .. أنا صوت الاهك
أنا أغلى من .. مالك وجاهك
ومن عيالك
ضمنى بإيديك .. لصدرك
وأحفظ سطورى جوه قلبك
مش بس ..
فى شهر الصيام .. من كل عام ..
تسحبنى من بين الرفوف
تنفض تراب عن جلدتى
وتمر عينك ع الحروف
ولا أنت واعى .. قُدرتى
أبكى عليك وأنا كلى خوف
من غُربتك .. أصبح غريب
خليك قريب .. خليني جنبك
إن كنت عاصى .. جوايا توبتك
وان كنت ناسى .. أنا بصيرتك
وان كنت قاسى
ف قلبى رحمة تشفى عذابك
أنا كتابك
أنا صوت الاهك
أنا أغلى من مالك وجاهك
ومن عيالك
ضمنى بإيديك .. لصدرك
وأحفظ سطورى .. جوه قلبك
هييجى يوم .. لازم عدورك
يفصلنى عنك
يبعد مابينى .. وبين أيديك
ساعيتها نورى من جوه قلبك
يشرق .. ينوَّر لك عينيك
ومهما طال .. الليل عليك
والسجن .. يستوحش قساه
إستعين .. بالصبر ..
وبنور الصلاة
رتل آياتى .. كل حين
صحى فيك صوت الاله
تكسر القضبان .. سيوفى
تسجن السجان .. حروفى
تنطلق .. شيلاك كفوفى
ع البساط .. لجنتك
وهى غايتك
ضمنى بايديك لصدرك
واحفظ سطورى جوه قلبك
***
من يومها وسطور الكتاب
باتت فى صدرى
سكنت حروفه .. فى العيون
والنور .. فى قلبى
ولا عُمر ذرة .. م التراب
ممكن تبات .. على جلدته
أنا أسيرة .. حبى ليه
طالبه شفاعته .. ورحمته
أنا كنت تايهة فى الحياة
مش لاقيه دربى
انا كنت عايشه ف الظلام
والفجر .. جنبى
بينى وبينه .. خطوتين
أنا كنت فين ؟؟
أنا كنت فين ؟؟
***
إيمان معاذ
