الأدب

من ديوان الشاعرإبراهيم رضوان ' عن الشخص الآخر '

كتب في : الأحد 24 مارس 2024 - 2:31 مساءً بقلم : الشاعر ابراهيم رضوان

 

* هو انت مين ؟*

قالهالى..بعدين اختفى

رديت..**انا..ويا اللى جاعوا..

ويا لابسين الحفا

ويا اللى عاشوا العمر كله.. ع السفا

ويا اللى باحث لسه عن نضاره..

أو نقطة شفا

ويا اللى مش طايلين دفا **

فاللى..* يا غاوى الفقر..

روح قابل ساويرس..

هى دى الدنيا اللى فيها العز..و الكافيار..

دى تبقى الدنيا جنبه..منصفه

سيبك بقى م الشحتفه *

انا قلت.. **فى زمن الجفا..

كل اللى طالبه لقمه..

بعد اللقمه..لازم اقول..كفا

يكفينى اغوص..مش فى الفلوس..

فى المعرفه **

قاللى.. * الحياه..محتاجه ألف و ألف حاجه..

بالدولار ..متكلفه *

أنا قلت.. **يكفينى حروف متكثفه

و سطور كتير متشرفه..

بحروفى..فى زمن التسكع..

و البهاق.. و الحنتفه **

قاللى.. *أجيبلك إيه يا شاعر ؟ *

قلت له.. **عندى طبق..على قدى..

مش محتاج حلل..ولا..مغرفه **

بداية الصفحة