صرخات وبكاء وعويل وصل إلى حد اللطم، هذا هو الحال الذي أصبح عليه المصريين، نتيجة سوء المعيشة وارتفاع الأسعار، فكل يوم يظهر فيديو لمواطن يبكي أو يشكو مما يعاني منه الشعب، ويحدث ضجة على مواقع التواصل الاجتماعي، وتتحدث الدولة بأكملها عنه دون أي تحرك يُذكر لحل أزمات هؤلاء المواطنين.

"كيلو المش بقى بـ25 جنيه"

شغل "خريج التوك توك" الذي هز عرش مصر، تفكير الرأي العام خلال الأيام القليلة الماضية، ولم يمر سوى عدة أيام على الواقعة ليحتل فيديو أخر الساحة، فقد تداول رواد موقع التواصل الاجتماعي "فيس بوك"، مقطع فيديو، لسيدة تشكو حال البلد، في تقرير مصور، والتي تسائلت في بداية الفيديو "صوتى هيوصل ولا مش هيوصل؟".

وقالت: "الطماطم والخيار والخضروات عارفين أسعارها بتنزل وتطلع، لكن كلمونا في الأساسيات، الراجل اللي معاه 4 عيال خارجين رايحين مدارسهم وكلياتهم، كل واحد ميكفهوش 10 جنيه مواصلات، هيجيب منين، غير فاتورة المياه والكهرباء اللي بتزيد كل يوم، والغاز الطبيعي اللي كانوا بيدوه لناس ببلاش دلوقتي بيغلوه علينا ليه؟".

وتابعت: "البلد كلها مشاكل، سعر الدقيق زاد والسكر غلي والزيت والسمنة حتى السمنة الهولندي بقت بـ15 جنيه، ده كيلو المش بقى بـ25 جنيه، أكلة الغلابة، أي واحد مش لاقي يأكل هيجيب رغيفين وحتة جبنة قديمة عاوز 10 جنيه".

واستكملت: "معايا بنتين واحدة منهم علشان تروح كليتها عاوزة 15 جنيه مواصلات بس، وعلشان تأخد معاها ساندويتش فول وحاجة سقعة بـ10 جنيه، يعني كل عيل عاوزله 25 جنيه، وعامل للفرد 15 جنيه، وبنزغرط ونقول تسلم الأيادي، الكبار ماصيين دمنا من 50 سنة، والنهارده إحنا هنسرق بعض، كل واحد عاوز يمد إيده في إيد اللي جنبه ويأخد، اللي فوق عمالين يصفوا في بعض عشان القسمة حصل فيها خلاف، اختلفوا في قسمة الحيتان والكبار بيمثلوا ربع البلد واحنا الغلابة الاغلبية".

وأضافت: "مبقناش نشوف أي برامج علشان كلهم كذابين ومنافقين، وبياخدوا ملايين على قفا الشعب الغلبان، ومجلس الشعب النائب.. اللي مترشح في دايرتي قبل ما يبقى عضو مجلس شعب كان بيقفل الباب في وش الناس، قولنا تسلم الأيادي وكسحونا، خلونا ماشيين مسحولين على الرغيف، بقينا نحسب هنجيب رز وعيش بكام عشان نأكل عيالنا، وفي الوقت اللي العيل الغلبان بيلحس كده، اللي فوق بيرموا قدوا أضعاف مضاعفة، وشباب ماتت وناس اتعجزت وعميت وناس مرمية في السجون بدون تهم عشان الناس اللي معاها مليارات يزودوا ملياراتهم".

"سائق التوك توك"

"نتفرج على مصر في التليفزيون نلاقيها فيينا ننزل الشارع نلاقيها بنت عم الصومال"، تلك الكلمات التي جاءت على لسان سائق "توك توك"، وزلزلت مصر الأيام الماضية، ففي ثلاث دقائق استطاع هذا السائق تفنيد كل ما تمر به مصر.

وقال: "دولة فيها برلمان ومؤسسات عسكرية وأمنية وليها 20 وزارة حالها يبقى بالشكل ده؟، قبل انتخابات الرئاسة كان عندنا سكر ورز بنصدره راح فين دلوقتي؟، ايه حصل وايه الحل؟، البرلمان يحتفل بـ25 مليون جنيه، والمواطن الفقير مش لاقي كيلو الرز في الشارع، وبنرمي فلوس في مشاريع قومية ملهاش لازمة والتعليم عندنا متدني، عشان البلد تنهض لازم تعليم وصحة وزراعة، ودول الخليج بقوا بيضحكوا ويتريقوا علينا ويقولوا إحنا بنديكوا وبنعملكوا، بعد ما كانت مصر بتطلع كسوة الكعبة كل سنة، هل ده يليق بمصر ومكانتها؟، مفيش حد قلبه على مصر ولا بيحب مصر يقول حرام ده ميرضيش ربنا".

وانتشر فيديو سائق "التوك توك" الذي جاء ضمن تقرير لبرنامج الإعلامي "عمرو الليثي" على فضائية "الحياة"، على نحو واسع على مواقع التواصل الاجتماعي، وتصدر هاشتاج "أنا خريج توك توك"، صدارة التصنيف اليومي على موقع التدوين المصغر "تويتر"، وحذفت قناة الحياة الفيديو بعد ساعات من نشره، فيما أدعى البعض أن السائق الذي ظهر في مقطع الفيديو يعمل مدرس إعداي وكان عضوًا بحزب الحرية والعدالة.

"معاشي 23 جنيه"

وفي فيديو صادم أخر، تداوله رواد مواقع التواصل الاجتماعي، نهاية الشهر الماضي، ظهر مواطن عاريًا في أحد شوارع الإسكندرية صارخًا "معاشي 23 جنيه يا حكومة".

وتابع: "يا رئيس الوزراء أنا معاشي 23 جنيه، أجيب بيهم عيش مش هيكفوا، أجيب بيهم فول برضو مش هيكفوا، فين وزيرة التضامن، فينك يا سيسي، 23 جنيه معاش يا عالم، بصوا راجل عاجز أعمل إيه بـ23 جنيه؟".

وظل المواطن جالسًا على الأرض يشكو "فينك يا رئيس الوزراء ياللي بتطلع على التليفزيون وتقول الدعم المستحق؟، هو مين المستحق؟، أصحاب الملايين ولا أصحاب الملاليم؟، مين المستحق يا سيسي؟".

"رجل يلطم على وجهه"

وفي أغسطس الماضي، احتل فيديو لرجل يبلغ من العمر 50 عامًا، ضمن تقرير مصور، "يلطم" على وجه بسبب الأسعار وقسوة المعيشة، اهتمام مواقع التواصل، وظهر في الفيديو رجل يصرخ قائلًا "العيال عاوزين يأكلوا، انا عاوز فلوس آكل عيالي، عاوزين نأكل بس بمرتباتنا"، في حين قام رجل أخر بجانبه بـ"اللطم" على وجهه قائلًا "حسبي الله ونعم الوكيل".

"متصلة الإبراشي"

فيديو أخر انتشر على مواقع التواصل، لبنت تدعى إيمان تنهار بالبكاء في إحدى حلقات برنامج "العاشرة مساءً"، الذي يقدمه الإعلامي وائل الإبراشي، على فضائية "دريم"، في أغسطس الماضي، قائلة "أنا كيميائية متخرجة بامتياز مع مرتبة الشرف، مرتبي كله 1800 جنيه، 12 ساعة شغل متواصل، بصرف على والدتي وأختي الصغيرة، والدتي بتاخد أدوية بـ1700 جنيه في الشهر، ومش عاوزة مساعدة من أي حد في الدنيا، أنا عاوزة أعيش، عاوزة أوصل لمرحلة أقدر أنزل الصيدلية وأجيب أدوية من غير ما ألاقيها غليت، انتوا بتعملوا فينا كده ليه؟، حاولوا تحسوا بينا شويه، كفاية أنا عندي 28 سنة ويائسة من كل حاجة في حياتي، إحنا جوانا حاجات كتير وجعانا، مش عاوزين مساعدة من حد، بس سيبونا نعيش".