وش رانيا أحلى وش

وش ما يعرف ينافق

أو يغش

لما اشوفه

تضحك الدنيا فْ عيونى

و أنسى آلامى وْ شجونى

و ان يفوتنى

يبتدى حزنى و همِّى

أصل رانيا

أم تانية بعد أمى

أصلى عارف قلبها

من غير غُلاف

بس دايما

لما ابص ف ْ وشَّها

أحزن و اخاف

عارف انِّى فْ لحظة هابعد

و اختفى جوه السكوت

يا حبيبتى

إوعي تبكى لمَّا اموت

عيشى عمرك و افرحى

دى الدنيا دايرة

و انتى عارفة الدنيا بيا

أو بدونى

برضو سايرة

لو حزنتى

راح يطُول بيا العذاب

و ان بكيتى

يشتعل فوقى التراب

هابقى حاسس بيكى دايما

مانتى حتَّة من كيانى

فى شقايا وفْ هنايا

فى بكايا و امتنانى

كفِّنينى فى مِلايْتك

عَطَّرينى بسحر طيبك

إمسحى خدى بكفِّك

ساوى شعرى بين صوابعك

مَلِّى عينك من ملامحى

أصلى ماشى وْ راح أسيبك

بعدها هابعد بعيد

سَمِّى إبنك

أى إسم مْن الأسامى

بس إوْعِى يكون وليد

أصل ممكن

بعد إسمى يكون له بختي

و انتى عارفة

بختى إيه بين البخوت

يا حبيبتى

إوْعِى تبكى لمَّا اموت

و ان قالوا لك

إن ابوكى قلبه قاسى

قولى بابا كان أمير

 كان يشيلنى

فوق كتافه و يجرى بيَّا

كان يخاف من هَبِّة النسمة عليَّا

كان يشوفنى قلبه يفرح

... كان .. يطير

و ان قالوا لك

إن ابوكى كان منافق

أو فى ليلة كان مرافق

قولى بابا همسة عدَّت من سكات

فى سكونه و اتزانه

من ميلاده للممات

و ان قالوا لك

إن ابوكى كان ملاوع

قولى بابا كان مطاوع

عاش حياته

طفل هادى

كان يجينى لما انادى

كان يقول طيب و حاضر

كنت اقول له كل سرِّى

أصله كان ع السر قادر

يا حبيبتى

كل ليلة اقرى لى آية م الكتاب

و ادْعِى ليَّا ربنا يكْفُل لى أمرى

و ان قِدِرتى

يوم تجينى تزورى قبرى

هتلاقينى فى انتظارك

رشِّى ميَّا ع التراب

و ازرعى ورداية بيضا

فوق جبينى

فيها ريحتك

تكبر الوردة و تطرح

تبقى واحة هى واحتك

و ان قالولك

و ان قالولك

مهما قالوا

إنتى عارفة إن أبوكى

نسمة نامت ع الشطوط

يا حبيبتى

إوْعِى تبكى لما اموت

********************

الشاعر وليد المليجى