الأدب
الباغي عليه الدور ! (بالعامية المصرية )
أصلُه مبينش إنُّه خسيس
أصلُه مبَينْش !
أصلُه مَبينش إنُّه بيعرف نسانيس
أصلُه مَبينش !
كانت الدنيا بتغلَا
وهو بيرخص وأنا معرفش !
بقى معقول كان عايش الدور !
راكب حنطور عامل غندور !
شريف وعفيف قال إيه مغدور !
بقى معقول !
عامل بيه مِتْصَدَّق ومبانش !
وف يوم حَضَّر روح الشرير قام رامى الزهر
لِعِب لعبة شياطين وقال مَحَصلش !
العيب مش فيه وعليَّ العيب راكب مَوَصَفش
ما أنا أصلي غشيمة وعُمري ما كُنت لئيمة
وف اللوَع أنا مَفهَمش
لابس توب راهب قسيس
عامل قِدِّيس
يقلع يلبس عِمِّة شيخ
يسجُد ويكَبَّر قافل ترابيس
يتشاهِد ويسَلِّم لا بيتفاهم ولا يتكَلِّم
واحنا يا عيني علينا محابيس مخاريس
مشغول مشغول !
وتناقشُه مقفول مهبول !
نومُه غَطيس !
بقى معقول !
وقال مبيعرفش لا بتاع سهر ولا رقص وهَلس !
ومقضِّيها محروم م الجنة
ف الساقية داير ولا عُمرُه اتهنَّى !
وبلاد السند ورعايا الهند عملولُه تمثال
بإدين نحَّات مَثَّال بيبيع اللب ف قراطيس !
بقى معقول !
ظالماه قاتلاه ومش شايفاه
راحت روحه بلاش يا عيني على مفيش !
ضحيَّة وأذيتُه أذِيَّة وخرابيش !
يا حرام مش عارف ياخُد حَقُّه !
ومعايا على طول فاقد وضعُه !
أكلاه بشفَّاطة شافطاه
ودماغه بتضرب شواكيش !
بقى معقول !
قوية وتندب ف عيني رصاصة !
وعلى حاجة غيري أنا بصَّاصة !
مهزوزة من غير شخصية وقمَّاصة !
ووجودي معدوم ! طفلة بمصَّاصة !
بقى معقول !
كان بحبوح !
إيدُه فِرطة وم الناس ممدوح !
عَلِّمتُه البُخل !
ومنعتُه يفكَّر بالعقل !
خَسَّرتُه فلوسُه نَهبتُه وبقى مفضوح !
رميتلُه غسيلُه نضيف من أعلى سطوح !
بقى معقول !
من ع الكوم جابني !
فستان لَبِّسني !
وكُنت ما بفهم علِّمني !
وفوقها كمان مِلك اتمَلِّكني !
حقي بيصرُخ قال ملكيش !
بقى معقول !
يا محاكم نوَّري النور
استقبلي البيه الغندور
افتحي دفاتر المشهور
وقضايا وحرب وعبور
بكرا الحق يبان والباغي عليه الدور
بقى معقول !
