الأدب
أنا مش قلت أنا جاي
أنا مش قلت أنا جاي يا أماي
ليه تفوتيني كيف و ازاي
أوعي تقولي أنا نساي
كل ما فيها باشوف شقي عمري
و بَصُر ف منديلي غناي
جاي محتار و بلم ف صبري
جاي بعديكي بجهز قبري
الدنيا مبقتش معاي
فاكراني و انا لسه صغير
و أنا بجري فرحان متحير
لما أبعد رجليا تخوني
الاقيكي تزعقي وياي
بس زعاقك فيه حنيه
كنتي تملي تخافي عليا
أنا فاكر أولها وصية
أسند طولك خليك شامخ
زي النخل البلدي يا ولدي
أوعاك يا ابني تخاف م القهر
إياك تقبل إيها عار
و سيب الباقي علي مولاي
قبل ما تمشي خديني ف حضنك
كل الدنيا متسواش بعدك
حتي أخواتي فاتوني و راحوا
سابوا القلب يعيش ف جراحه
هو صحيح قدري و مكتوب
غصبا" عنهم حالي و حالهم
عمره الحق ما كان نساي
أدعي ربك علشان خاطري
أوعي تتوه ع الخط يا ولدي
لو باقي أيام من عمري
يرحمني و يسترها معاي
كلمات / صبحي ثابت بشاي
