الأدب

يا دُنيا ارحمينا (بالعامية المصرية)

كتب في : الثلاثاء 04 مايو 2021 - 9:40 مساءً بقلم : حنان العجمى
مالِك يا دنيا العجايِب؟
الفرح لِيه فيكِ غايِب؟
دَا أنا كُنت ف هواكِ دايِب
وماشِي فيكِ إدَيَّا سايِب
ومالُه الزمن مالُه
و لَا حد راسِي على حالُه
والكُل الهم طَالُه
والنَّاجِي أُمُّه داعيالُه
وحياتِك يا دُنيا لَصَاحِب الزمن
وسُكَاتِك إلِّلي زلزل جُوَّايا
هَد آمالي ومُنايا
أحلفلِك لَيدفع الثمن
وأسافر فيكِ طول وعرض
أطلع جبل وأنزل لسابِع أرض
وبركاتِك بُكرا تحِل عَليَّ
وأفَكَّرِك هَتضحَكِي لِيَّ
وتسمعي غُنايا وتسهر لياليا
بقُدرِتَك يا رب ساعدنِي أتمَكِّن
فاكرانِي هَسَلِّملِك يَعنِي؟؟
عايزانِي أركَعلِك بَدرِي؟؟
لِسَّانِي واقفلِك وبطُولِي
وحدانِي تارِكلِك روحي
و مِين يِداوِي جروحي
شرِبت مُر بحورك مُضطَّر
غرِقت و مُوجِك شالنِي
عشِقت وقلبك خَدنِي
دُوخت و جَريِك سرقنِي
رجعت لِبَر أمانك بِعِد الشر
فِ حُبِّك مغلوب على أمري
ماشي ف طريقِك من غير رجعة
عارِف ف يوم عَليَّ هَتحِن
تفرِشلِي الورد مِشْ خيال ولا ظَن
إوعديني نتقابل
احضُنيني من غير عِنْد
ولِيكِي عندي مِشْ هَكابِر
وصبري عليكِ دَا قوة
لَملِمت ضلوعي و رفعت قلوعِي
على كسرِك خلاص مِتعَوِّد
ولا هَضعَف ولا يُمكِن أَرقُد
ارمينِي لفُوق و بشمسِك دَفِّينِي
بِنجومِك غَطِّينِي
و ف سَمَاكِ خَبِّينِي
سَعِيت والجبر على الله
بَكِيت والقهر سَكَنِّي
وعنيكِ شايفة قلوب بِتخُونِّي
تِطعَن فِيَّ وأَعافِر
تحرق دَمِّي واتغَافِل
أَخَيَّط أَلَمِي وأثابِر
أدعِي رب عَ الظلم قادر
مِشوارِي راسِملُه نهاية
لا هَعِيد ولا أزِيد
مِشْ هتكَلِّم لا اتحَكِّم ولا أسَيْطر
لكن هزرع وأحصُد وفيكِ هَغَيَّر
و هَجنِي الفَرْح بَشايِر
و نَدْر عَلَيْ لَأعيشلِك ثايِر
و هَكِيد الأعادِي
و أغِلْ أيادي العوازل
وأسجِنِك فِ فَرحتِي
وأختار حياتي ودُنيِتِي
ويشاركوني الأحباب
ويطلعوا معايا السحاب
و يِضحكلِي قمر حقيقي و مِشْ كَدَّاب
ولا أفَكَّر فِ لُوم ولا عِتاب
وفِيكِ أنا رَحَّال متواضع مِشْ مُختال
وهَعِيش خالي البال
عنِيكِ عَليَّ و راقبِينِي
حِلِفت ما أَضَيَّع سِنِينِي
يا أنا آخْدِك يا انتِ تَاخْدِينِي
مِشْ هَتسِيبِنِي و بَتْحَدَّاكِ
ولا تكُون لِي فَرحة إلَّا مَعاكِ
عارفِك غَدَّارة
لكن وَعدِك لِيَّ أَمارَة
و شايْفِك يا دِنيا دَوَّارة
وإلِّلي تحت فوق بِمزاجِك
وأنا غلبان مِشْ حِمْلْ مزَاحِك
و هَسكُن بَراحِك
و ف عِز الضُهر الرُّوس هَتبان
مِين صافي القلب
و مِين خايْن وجبان
مِين دِينُه الخير والحُب
ومِين هَيتْحَسَّر ندمان

بداية الصفحة