أكدت الفنانة مي كساب، أنها تستمد قوتها من جمهورها، وذلك خلال الأوقات التي تعاني فيها من ضغوط شديدة، أو مواقف صعبة.

جاء ذلك ضمن ما نشرته مي كساب، عبر حسابها الشخصي على موقع التواصل الاجتماعي "إنستجرام" حيث قالت: "مكنتش عاوزة أكتب أي حاجة ولا أتكلم، بس اتعودت إنكم جزء مني، بفرغ اللي جوايا معاكم وبفرح بكلامكم الحلو اللي بيديني كل الطاقة الإيجابية اللي بتخليني قادرة أكمل في الحياة".

وأضافت "مي" قائلةً: "إمبارح كان يوم وحش قوي، أصعب من يوم وفاة أمي، أول مرة هقول الكلام ده في حياتي لما أمي ماتت فضلت تعبانة نفسياً جداً وحاسة إن أنا السبب، أنا اللي أخدتها وإديتها الإشعاع وفضلت عايشة كتير بالإحساس ده، بس الحمد لله ربنا كان حاضني جداً، وإداني إشارات كتير قوي تبرد قلبي وأنا الحمد لله جريت على الكعبة عشان أبرد قلبي، وعملت عمرة لأمي وهديت خالص، وقلت إنا لله وإنا إليه راجعون، ده عمرها وانتهي لحد هنا".

وتابعت "مي" قائلةً: "إمبارح كنت شايلة فريدة مشيت بيها بالظبط متر من الريسيبشن للجنينه، كنت عاوزة أقعدها في الشمس راحت إيد الكرسي مفكوكة ووقعت على الأرض، عشت أسود يوم في حياتي كنت حاسة كأني مجرمة مذنبة، قلبي مش قادرة أوصف عامل إزاي، عينيه ما بتنشفش من الدموع، عندها كسر في عضمة الترقوة، يا قلب أمك، طب دي هتستحمل، إزاي هنام، إزاي الليل هيعدي علينا إزاي، بس ألف حمد وشكر لله، عدي الليل وربنا رحمته واسعة الحمد لله".

واختتمت "مي" المنشور قائلة: "قل لن يصيبنا إلا ما كتب الله لنا، ربنا يحفظ أولادنا، الضنا غالي قوي، الله يرحمك يا أمي، ربنا يقوي كل الأمهات والأبهات علي تربية أولادهم، والحفاظ عليهم، ربنا يقدرني ويحفظلي بنتي ويخفف عنها الألم، بصتلي بصة إمبارح بالدنيا كلها، كأنها بتتكلم وبتقول لا يا ماما متعيطيش، أنا هبقي كويسة، ربنا يحفظك يا نور عين ماما ربنا يرزق كل مشتاق".