الأدب
حلم مصرى
حلم مصرى
******
انا حلم تايه من سنين
تفسير لواقع مش تمام
حافظ ودارس كلمتين
شايف نجاحى ف المنام
زاهد فى غاية الإنبساط
ونصيبى عقدة ف سلسله
مخنوق وباتنفس عياط
صعبت عليا المسأله
حاجز كابوس جوه العيون
شايفه ف شاشات عرض الحياه
مجبر اعيش على كل لون
وامشى طريقى لمنتاهاه
واسمع كمان وياه اغانى
لحياه بعيده مطمنانى
والصدق كان واخد مداه
ف اول سرير
ضايفت نفسى ف الحياه
بحاجات كتير
اولها كان الحلم ده
شوطه تودينى النجوم
لكن القلوب متهدده
شبعانا لوم
واستاد كبير مليان وشوش
علق على عقول البشر
راسم كيان اخضر باشوش
كاتب عليه سكة سفر
رامى شـِبك بذرة نجاح
تحت المخده الحالمه
يعجبنا تسديدة صلاح
تبقلنا اول سلمه
فاصل يعيد الذكريات
ويزيد يقينا بربنا
حافظ نشيد من وقت فات
والفرصه ضاعت مننا
بس احنا نومنا مش تقيل
والحسبه رسمت حلمنا
اركز بقى خليك اصيل
هم اللى سرقوا فرحنا
طير فى السمااا زى الحمام
قصر وسيبك م الكلام
مش كوره يعنى تهزنا
***********
نور درويش
