الأدب
شمس المحبه
( شمس المحبه)
.....................
الشمس ماشية مروحه
فاردة الحنين علي كل بيت
والذكري بتلم الدفا ساعة الغروب
و احنا يادوب فاردين شراع المركبه
والحلم لسه بيتولد جوا السنين
كل الحاجات متكركبه ومخلبطه
كل الساعات و من سكات
الوقت عدانا وفات وترك لنا
حبة انين ونقول لمين
ان الحياة مش بس حبة ذكريات
ان الحياة مش حد كان غالي علينا
سابنا ومات
وترك لنا جوا الميراث
من كلمة حلوة وطيبه
ضحكة بتتعكز عالوشوش
فوق الخدود
الدمعه منها قريبه
نازله تنوح م الفراق والاشياق
مالهوش دوا
غير بس كان حبة صور
متجمعه ف شريط حزين
جوا البوم الزمن
و مفيش تمن
يقدر بانه يشتري الرحمه ف قلوب البشر
او يستلف إحساس مشاعر
او مرة واحدة يختلف عن طبعه
في كسر الخواطر وان كنت شاطر
م انتاش هتقدر ع الغدر من طبع الزمن
والشمس ماشيه مغربه فوق السطوح
واقفه الصبيه عمال بتنشر ف الجروح
يمكن تجف لها الدموع
وتعلق الجرح بمشابك فوق الحبال
جايز ف يوم شمس الشتا
دي تطهر الجرح الحزين
بس الشتا قافله البيبان علي شمسها
و ف ضيها وقت الشتا ملهوش امان
بتلاقي فيها الحزن شابك
ومتبت المسكة قووووووي
علي طرف توب بتحب دايما تلبسه
هو انتوا ليه بتنقصوا ف حق الضمير
مستكترين ضحكة حزين وبتحسدوه
علي بسمه جاتله مره صدفه من الزمن
و الشمس ماشية مضلمه
ولون عينيها مليان حمار
واقفه لها طفله وماسكه ف الايد درسها
ترميه ف عين الشمس يتبدل جديد
وتكلم الشمس المهاجره لوحدها
كل الطيور بتسابق الشمس ف غروبها
وتبات علي غصن الليالي المجروحين
آاااااه م السنين ياما فيها ناس بتعلي ناس
بس الاساس والاصل واطي
طبع الخسيس مهما بيعلي يفضل مطاطي
ياللي انتوا بتغلوا الرخيص وتقدروه
الشمس دايرة عالزمن بتجيب ف ليل
وبتفرش الصبح بنهار مليان حنين
قادره ف يوم انها تطوي كرات الزمن
وتبدله وتحوله من ليل بيملاه السواد
لفجر مليان ب الأمل من ضيها
ممكن تحقق مستحيل مين زيها
شمس الاصيل ولا مرة غابت
مهما السحابه تصدها
بتحطم الغيم بالشعاع
وسهامه مليانه بنور
بيرسم الضحكة ف خضار علي غصن ورد
روح المحبه لو ف القلوب
تصفي النفوس من اي حقد
نبدر حنين ويا البذور والشمس مابتحرقش ارض
مليانه خير مفيهوش رياء و لا غل قلب
الشمس تطلع ف كل يوم بخير و حب
وسؤالها متكرر يوماتي
هل من محب هل من محب ؟
الشاعر / محمد النمر
