الأدب
كان لازم تغيير ' بالعامية المصرية '
متتعوضش ولا بمليون واحدة متتعوضش
كانت الحياة بتحيا فيها
كانت البسمة لروحي وف زعلي تعزِّيها
كنت سر الحزن ف عنيها
لا بفهمها ولا حاولت ف يوم الفرحة أهديها
كنت ببعد ف كل خطوة تقرب
كانت تقول الشمس هتشرق كنت بغرَّب
كانت الدفا في فصل جليد بتتعذب
وليه أكون مهدي ما هي موجودة ومش رايحة
قايمة بكل واجباتها وصالحة
الراجل بحضوره ويتكلم ليه سكوته بيكفي
ليه يشاركها الضحكة ليه يمسح بإيده دموعها
ما هي قاعدة وصابرة بإرادتها
واجبها تضحي وتتحملني
عايزة إيه تاني ما أنا بشقى عشان راحتها
تربية العيال والبيت وظيفتها
ف يوم قالت تعبت خلاص آه
وانا عادي نمت وريتها اللامبالاة
هتاخد أي دوا ومُسكِّن جايباه
صحيت بدري أو باين منامتش
تحضَّر فطار وزن العيال مبيسكتش
وانا مالي هتتصرف وعشان انزل شغلي لازم أرتاح
ألبس وأنزل وهي مشغولة بتلم غسيل
لا عايز أشوف شكوى ف عنيها ولا احس بتأنيب الضمير
ف يوم طلبت طلب كبير
أقعد معاها اتسامر نشرب فنجان شاي خطير
طموحاتها كبرت ام العيال
بتشوف مسلسلات تركي خيال
ودا جزء من مشاهد حياتي معاها
وسكتت شهرزاد عن الكلام المباح
لا عادت بتحاول ولا عاد يشرق صباح
الباقي هحكيه واعترف إني صاحب فكر عليل
وإني ندمان على أفعالي معاها
وعندها حق كان لازم ثورة وتغيير
