خذلني وقال انتهى دوري

وجابلي ملح أحُطه على جدوري

وقال موتي عشان أعيش

وذنبي إن كان ليَّ حضوري

ف وقت غاب فيه عمدًا

كان لازم أقف ضروري

كان لازم أشيل مركب بيميل

بإيدُه كان بيغرقها

حطَّم كل شيء بنيتُه

نكَر كل جميل

والخير قال عليه شروري

وجعي كان بيصرخ

ليه قتلت فيَّ شعوري

عشت حياة التماثيل

موميا مُحنَّطة مع فرعون

بخ السِّم ف ضلوعي

وقال سحرولي!

ونسي إن لولا رفعتُه على كرسيه

ما قامت له قومة ولا ريشُه اتنفش

كان لابس توب الطيب

ماسك عصاه بيها الأرض يضرب

ادَّعى إني مش شايفاه

وأنانيتُه قامت وخداه

غدَر وخان

وكُنت على سجادة الصلا مستنياه

وعلى عيبُه وضعف شخصيتُه عارفاه

قلت أعدل حالُه المقلوب

زاد ف عِندُه وغروره

العصا رماها ظهر تعبان بديل طويل

يلدغ إللي يَقرَّب ويغمَّض عنيه

بديلُه ضرب كل ما حواليه

أفعى مجلجلة جرسها رنان

نوى على دور الأُلعُبان

يسجل ويحذف ويركِّب

ويعلِّي صوتُه ويشهِّد كل قرد وأبو قردان

غراب ينعق شوفوا أنا مش غلطان

يألِّف قصص يداري بيها خيبتُه

أتاريه كان مخطط ولعبها صح التِّعبان

خذلني ف وقت ما كنت رافعة راسُه

دبحني وسط ناسي وناسُه

لا خاف من رب شايفُه

ولا وِلد مسك فيه وحايشُه

ولا راعى ضمير ولا لُه كبير

قادر ع الفُجر

شَرَد مع البعير

ونهق كل الحمير

فرحوا في الخراب

واتفتحت كل الأبواب

وريح دخلت من الشبابيك صفير

والفرح اتنصب

وقالوا خسرتي أمير !

مع إني اتربيت إن الأمير

ما يرمي لحُمُه

ولا عِشرَة يخون

ولا يفضح ويعيب ف اسيادُه

وهو نفسُه كله عيوب

عايش كالنِّعاج أسير

خذلني الخسيس

واكتشَفت إنه عيِّل سيس

لا لُه في شيَم الرجال

ولا يعرف إلا بوس النِّعال

يجري ورا القرش

يلحس الأرض بلسانُه

وما كُنتش أعرف إنُّه جبان

وإنُّه بالرخيص يبيع دمُّه

يدوس على لحمُه وناسُه

جزء من سيرة ديك البرابر

وحكايات عندي كتير

عن الواقف ع الباب غفير

رقص ع السلم

لا طال فوق ولا تحت الزَّير

*********** 

بقلم الأديبة والشاعرة والكاتبة الصحفية

حنان فاروق العجمي

جمهورية مصر العربية

محافظة الإسكندرية