الأدب
حالك هلاك 'بالعامية المصرية'
من غيري عيشتك مرار
من غيري حالك هلاك
كنت مخدوعة فيك ...
عشت عمري فاكرة إنك ملاك
فاكر إني ندمانة ...
فاكر مش هنساك
كتير حاولت أفَهِّمَك
مش فارقلي وجودك
حياتي كانت دمار
كنت تعيسة معاك
الله لا يوفق خُطاك
والقهر يكون دواك
كنت خاينِّي...وبتتهمني
إني ظالمة... إني بايعاك
سايبني أضحي... سايبني أداوي
رصاص ف قلبي وأتحمِّل عماك
من إمتى كنت موجود...
عشان أفتكرَك أو أنساك
ولا أثَّر فيَّ فُراقك
ولا هرضي غرورك...
ولا تفَكَّر هترَجَّاك
وبدعي ربي لا يجمعنا يوم
لا عايزة أشوفك....
ولا بتمَنَّى لُقاك
ولا أيامك ترجع تاني...
ومن ذاكرتي أنا ماسحاك
خليك عايش بوهم مُفتقداك
وإني هموت بلاك
أي حُب وأي غيرة؟
وكان فاسد هواك
سم ف عروقي ماشي...
ولسَّه بتفزع أحلامي...
وكارهة مشاهد رؤياك
كرهِت عيني يزورها النوم...
رافضة كلامك وكتاب ألحانك
حتى وعودك ناسياك
عالج أوهامك ...
وجنون العظمة إللي راكباك
فرصة وراحت مِنَّك
اعتبرني نهر غرِق ف حُفرة
ورَدَمتُه بغباك
اعتبرتك تراب برجليَّ دوستُه
وحبَست نارك جُوَّاك
النهاية إنك ملاك بقرون
ومش مسامحاك... مش مسامحاك
