طفل عنده توحد عمره اربع سنين . كان مسافر مع أسرته رحلة داخلية في أمريكا.. الولد زي كتير من أطفال التوحد أو أطفال ذو فرط فى الحركة وغيرها من الاضطرابات.. مبيستحملوش ضغط الطيارة وصوتها خصوصا في الاقلاع والهبوط المهم الولد رفض يربط الحزام ويقعد على الكرسي .. وبدأ يصرخ ويضرب ويركل اللي حواليه. المضيفة بلغت الأم ان الطيارة مش هتطلع طول ما هو رافض يربط الحزام.. الأم مش عارفة تتصرف ولا تسيطر على الموقف والوضع بيتوتر. بدأ الركاب والمضيفات يحاولوا يهدوا الطفل وفي الأخر الطيارة طلعت والطفل على رجل أمه وأبوه ماسكه وبعدها سمحوا للطفل انه ينام في ممر الطيارة اللي الاهتزازات اثناء الرحلة خلته أهدا بعدها المضيفات سمحوا للطفل انه يقعد في الدرجة الأولى والركاب كلهم رحبوا بيه هناك حتى رغم استمراره في ركل الكرسي اللي قدامه واحد من الركاب قعد يلاعبه ويطلعله صور يتفرجوا عليها سوا وحاول يحتويه المضيفة حضنت الأم وكتبت جواب بخط الايد في نهاية الرحلة قالتلها فيه "انتم محبوبون ومدعومون.. متخلوش حد يضايقكم ويحسسكم انكم عبء .. ابنك نعمة.. ربنا يصبرك على دعمك وحبك وقوتك.. استمري في كونك سوبر وومن" انا بكتب الخبر ده ردا على الناس القاسية جدا اللي بيتهموا الأمهات ، أي ام سواء ام لطفل عادي او طفل مريض او صاحب إعاقة او اضطراب، بيتهموهم بالاهمال والتطنيش.. و بيتذمروا ويتزهقوا اوي من طفل بيعيط في الطيارة او باص .. ومطلوب من الام توزع بونبوني ورسايل اعتذار وقلوب حمراء للسادة المسافرين علشان يرضوا عنها.. علشان الصورة تبقى حلوة واحنا بننشرها على فيسبوك الحقيقة الصورة مش حلوة طول ما الناس متخيلة ان الأمهات عندهم رفاهية القرارات الحاسمة بتاعت اقعد وكل واشرب واسكت.. ومش حلوة طول ما انتم متخيلين ان كل الاطفال لازم يدخلوا في القالب بتاعكم ويسكتوا وقت ما تحبوا تناموا وينفذوا الاوامر بخنوع خصوصا الرضع وسن ما قبل المدرسة أرجوكم احترموا ظروف الأمهات.. واحترموا الحالات الخاصة.. واحترموا الاختلاف.. الطفل ده مرعوب من صوت الطيارة اللي بيسمعه اضخم واعلى منك.. مرعوب من الناس الغريبة اللي حجمها كبير وبيكشروا في وشه.. مرعوب ومتضايق ومبيعرفش يعبر بالكلام.. وخنقة الكلام بتخلي وسيلة التعبير الوحيدة هي الصراخ والضرب لعل حد يحس بيه ممكن لو قررتم عدم التعاون مع الامهات وقت السفر، تعملوا حسابكم على سماعات تحطوها في ودانكم لما الصوت يضايقكم هاتوا اي حاجة تغطي العين وتريحكم من اي منظر يؤذيكم.. استحملوا شوية من باب الرحمة والذوق