سالخير عليكوا كل اصحابي وصحباتي ويوم جديد من يوميات حشرية.... يااختشي قايمة الصبح لابيه ولا عليه ولسه بفكر هنفطر ايه النهاردة ماحنا صايمين بقي ورمضان عاوز شوية تحابيش... الاقي اسم النبي حارثه وصاينة الراجل بيقولي اعملي حسابك امي جاية تفطر معانا النهاردة.... دي الخيبة وليه
النكد دة ع الصبحيييية... بتقولي حاجة ياام امل....؟ لااااا ياخويا دة انا بقول وماله، تيجي يامرحب... الا قولي ياابو امل هي اسم الله عليها اختك لسه غضبانة عند امك وقاعدة هي وعيالها ولا جه المحروس جوزها خدها....؟ 
*يعني هي اختي والعيلين هيعملوا ايه كدا كدا الاكل بيفيض وبيترمي.... *يارااااجل هو انا بتكلم ع الاكل.. ولاد اختك دول، معجونين بمية عفاريت.. ييجوا بقي يقلبوا الدنيا، وانا مافييش حيل انضف وراهم... 
*معلش ياام امل عدي اليوم دة عشان خاطري
*طيب اكلم امي بقي تيجي بالمرة هي ومرات اخويا... اصلها حامل ومش معقول، امي هتسبها وتيجي مانت عارف دول عايشين، مع بعض.. وهي اللي خادمة امي... *ياوليه هو دة وقته اقولك نعزم امي تقوليلي امي ومرات اخويا
*يوووووه ياراجل وماله واهو نبقي خلصنا م العزومتين.. بلا هده حيل... ويدوب، دخلوا من باب الشقة والراجل مسك اخويا، وتعالي ياحسن الاعبك عشرتين طاولة علي مايخلصوا الفطار ودخل وقفلوا علي نفسهم ....والواد ابن اخته اجاركم الله تقولوا، شيطان ياواد اقعد بطل شقاوة وولاد اخته علي ولاد اخويا ولعوا الدنيا
الواد ابن اخته تقولوش راضع علي كلب مسك دراع ابن اخويا كلوا لاااا دة كدة كتير اوووي روحت لاخت، جوزي ماتلمي ياختشي ابنك السعران دة كل دراع الواد هو انتوا مابتاكلهوش لحمة ...ماله معفرت كدة ليه ....ترد عليه اللي تنضرب *مالك ياختشي بالواد الله واكبرعليه
ومرات اخويا الهبلة واقفة ساكته قلتلها لااااا
دة ابنك ناقص تربية هنحسدوا علي ايه بلا وكسة تقولي دة ابن اخوكي اللي قليل الادب
اخيرا بقي نطقت مرات اخويا ياختي دة انا ابني متربي احسن تربية.... مالهوش لازمة الغلط
تيجي حماتي قال يعني هتخوفنا *مالكوا انتي ومرات اخوكي طلعنوا في البت كدة ليه
* وانا بقي ماسكتش جري ايه، ياحماتي انتي جاية تولعيها... الولية تقولي *لاهولعهاولا اطفيها يلا يابت هاتي عيالك ويلا نروح، نفطر في بيتنا يخرج الراجل انبي حارثة وصاينة جري ايه ياما صلوا ع النبي هتزعلوا علشان العيال اقعدي ياما والوليه ابدا *امسكي فيهم يقعدوا ياام امل * سيبها براحتها ياخويا انا قلتلك ولاد، اخوك دول عفاريت وخدوا بعض ونازلة الوليه تبرطم ع السلم سيبنهالك مخضرة 
*ياختشي بورييية منك ولا مخضرة ولا محمرة
يخرج اخويامن الاوضة هو في ايه ياجماعة تقوم مراته تزعقله وتقوله افتكرت تخرج تسال دلوقتي ...ادورتلها بقي مالك ياختشي بتهبي ف اخويا كدة ليه ماتتكلمي عدل... تقوم تقولي جري ايه ياام امل انتي هتتدوري عليه... هااارك اغبر انتي هتزعقيلي انا كمان ولا ايه... ماتلم مراتك ياحسن اسم الله عليه حسن اخويا، راجل قام شاخط فيها نطتها قام عاوزة تمشي وامي تقولها يابنتي عيب دة الاذان قرب ابداااا
يروح حسن اللي كان عامل ميت راجل يقلب بطة بلدي حقك عليه قلتله ايه دة انت هتتحايل عليها اما انك راجل هفأ واي كلام قوم مش قادر عليها يقدر عليه..... * يلا ياما نروح نفطر في بيتنا والدنيا قامت ماقعدتش.... مابقاش حد خالص الاقي الراجل اللي يجيله ويحط عليه يقولي* ارتحتي لما ولعتيها نار وطفشتي امي واختي حتي اخوكي ومراته غاروامن وشك
لهووووي علي كدة امال الاكل دة كله مين اللي هياكله... يلا بقي مالهمش نصيب طب انا هشهدكوا انا غلط في حاجة انا كنت بخلص العيال من بعض...... الراجل يقولي حسبي الله ونعم الوكيل... يمهل ولا يهمل تفتكروا بيحسبن علي مين...؟ امي واخويا و مراته ولا امه واخته.... انا مالي يولعوا كلهم....... 
اقعدوا بالعافية