الأدب
الملايكــــــــــــــه
بلدنا فيها النخل عالى
مين يطوله
بمد ايد....
بلدنا فيها الطرح غالى
مين يقدر
مين يزيد....
بلدنا لما الارض عطشت
راح ضناها
يروى غيرها
بميه فاتره
وتاه بعيد.....
أحط راسى ع المخده
يجينى نومى
يدوب ف ثانيه...
جه ملاك الرحمه ملس
حط ايده فوق عينيه ..
قام عدل لى ف المخده
شاف ف رجلى الشق يحفر
ترعه فيها الميه راكده ......
بالجحود طلعت لفوق
رسمت خطوط
بريشه شارده....
برضو نايمه
ومش هافوق...
أصل عينه عليه بارده......
حاسه ايده
عرى جسمى
بكف إيده يريحه ...
فك شعرى لما شاف
من تعبى ناسيه أسرحه....
ياملاك الرحمه جابر
بالخواطر
وبحنانك...
السرير ده مش مقامك
لو ب ايدى هاصلحه ...
العين بصيره..
لو عليا كنت أجيب
سجاده عجمى فوق رخام
عشان تجيلنا ....
مهما اجيبلك
مش هاوفى لحظه حقك
وانت فوق ساكن هناك أعلاها جنه....
ياملاك الرحمه عندى
جوز ملايكه
هايجيبولى م السما
تفاحه حمرا
بحبها ...
لو فى نبقه
هايجيبوها
لو ف سدرة منتهى.....
الملايكه عمرها
ف الكون مديد....
لو هتفحت ف الحديد
يلين ويخرج رزقها ....
بلقيس وقاعده ف عرشها..
فوق جناح ابيض كبير
أركب واطير لصرح عالى من إزاز وتحته ماء....
أو أكون ذات الرداء...
أمشى ف جناين
والملايكه
تجيب لى قوت ...
أجرى ألم ب إيدى توت ....
حضن الملايكه
تحس فيه
طعم الوفاء....
شق الصوات
فستانى الاحمر...
تحت رجلى التوت
هياخد منه طار...
الصوات من كل دار...
والملايكه من بعيد
سامعين نداكوا...
كل بيت خارج يشوف
راح فين ملاكه.....
بحر الغروب عالى وعنيد من كل بيت واخد شهيد
لما سالوا الشط عنهم
قال الملايكه من رشيد .....................
سهير سليم
