الأدب

بحور جراح 'بالعامية المصرية'

كتب في : الاثنين 30 يناير 2023 - 2:16 مساءً بقلم : حنان فاروق العجمي

 

كان حقي أرتاح

بعد سنين شقا وعذاب وقهر

كان حقي أرتاح

بعد ما خليت قيمة للصفر ومكانه بعد الفراغ مليان

كان حقي أرتاح

بعد معافرة وصدمات وسهر

كان حقي أرتاح

بعد ما قلبي ملاه الحزن

بعد ما ودعت ربيعي وراح العمر

والله كان حقي أرتاح

بعد ما شلت الشيلة وحدي واتقسم الظهر

بعد حتى ما أملي ف تغييرك راح

كان حقي أرتاح

بعد ما تعبت وربيت

بعد ما مرَّضت واتحملت فوق طاقة البشر

بعد ما غفرت كل اللي لا يمكن ينغفر

بعد الجفا بعد الظلم

بعد القسوة وشُرب المُر

كان لازم أرتاح

بعدد أيام الليل وسواده

والشمس اللي ودعني نورها

وكآبة سنين محاوطاني بسورها

وبحق حياتي اللي راح منها النهار

لأخلِّي خيالك يخاف حروف اسمي

مكنتش عايزة غير الأمان

بس أغمض عيني ف يوم وزي الناس أنام

استخسرت فيَّ حتى ضمة قبر

مَوِّت جوايا الإحساس وعشت الأسر

لا من حقي أبكي ولا اشكي آلام

لا قادرة أفرح ولا حتى حزني يبان

وكل حتة ف روحي وجسمي بتنهار

أشهدلك إنك فعلا جبار

لكن كنت عايزة أرتاح

لو كنت روحت وسبت أربع جدران

كنت هجيب الإبرة وأضُمُّهم بشوية خيطان

كان كتير عليَّ أعيش مع خرس الحيطان ؟

كان كتير عليَّ باب مقفول ؟

كان كتير تسبني ف حلم إن عندك مروءة معقول ؟

تعرَف إني مش متخيلة حقارتك للآن

كنت روح بس سيبلي شوية طوب يداروني

وهتفرق يعني ! ما طول عمري ف ظل تمثال

مكنتش هتكلم ولا هتفتَّح في ضلوعي عنين الغيلان

كان حقي أرتاح

انت اللي بدأت وبعت وحاربتك من قهرتي

عليَّ وعلى أعدائي وهانهيك يا جبان

وصوتي يِدوي ف كل مكان

دا اللي خان دا اللي خان

دا اللي باع العشرة

ورمى العيش والملح والود ما صان

دا اللي أكل لحمي حيَّة

دا اللي طعني ومص دمي

ارجموه دا شيطان

دا اللي صاحب الشر

دا اللي نسي إنُّه ف يوم كان كحيان

دا الغدار اللي ملوش أمان

تفتكر كده خلاص هرتاح ؟

دا جزء من عقابك ف اللي راح

دا نقطة ف الماضي وبحور جراح

لسه هكمل ف اللي جاي

وليوم قبض روحك مش هرتاح

بقلم الشاعرة

حنان فاروق العجمي

بداية الصفحة