الأدب
أنا إنسان (بالعامية المصرية )
لو سألوني بتحب إيه
أقول بحب المية والهوا
أحب أكون إنسان
أعيش ف دنيا مفيهاش وشوش ألوان
أجري أفرح وأرقص بكل مكان
البسمة تبقى صاحبتي
الغنوة هي كلمتي
أعيش الأحلام
وأعيد من تاني الزمان
أشوف ناس غير الناس
يحضن روحي الأمان
كانت أمنية
لكن الرضا باين ف عنيَّا
بحمد ربي ع إللي كان
ويشهد موج البحر
إللي لمس رجليَّا
إن عمري ما كُنت قلاب
ولا يوم زعَّلت حد
على طول كُنت أرُد
فاتح الباب
لكن معملتش حساب للغدر
كُنت فاكر كل الناس أحباب
ولا لعدو حسبت حساب
جيت على نفسي كتير
عذبتها سكِّتَّها
حرمتها من حقي ف العتاب
وكان طبع الشر فيهم غالب
كُنت فاهم إن الخير قادر
عليهم غلَّاب
طلِعت غشيم
وحاوطني كل لئيم
ولسَّه مبحرَّمش
متعلِّمتش فاتح شباك وباب
أعمل إيه ما هي خلقِتي
ودي مِلِّتي
وإللي يسَلِّم أسَلِّم
أدِّيلُه لُقمتي
أقول غلبان يطلع كداب
لو سألوني أكيد ندمان؟
أجاوب وأندم ليه أنا إنسان
