ثقافه وفنون
(بيت للبيع)
خلاص ناوى أبيع البيت
ومين راح يشترى منى
.. حيطانه لسه مكبوته
من الأوجاع
تبات ليلها بتتقلب
على جمر الفراق ب الآه
وقلب الصبر من توبها
بيتحايل على شوقه
يناجيها يقول الله ..
يا زارع ف الوجود رحمه
ورحمه منها ترحمنى
مابين الخلق والزحمه
بعيش ف الوحده تألمنى
وبهرب بين خيوط فجرك
وأمد ف خطوتى توهه
ولا أسألشى
منين أمشى
ولا أرجعشى
أكلم نفسى من تانى
ف حضن تابوت
وفين راحوا حبايبنا
وليه الدنيا تغلبنا
خلاص ما هواها دوبنا
وراجعه تانى ترمينا ..
يا زارع ف الوجود طيبه
ب طيبة القلب طَيِبنى
ما راحوا وطولوا الغيبه
ب شكوى أصلها منى
مانيش مرتاح
مافيش أفراح
ف قلبى جراح
وحضن البيت إذا يفتح دراعاته
بيدعيلى مع التسابيح
ويسألنى
على دوشة عيال تضحك
ف تتمايل بيبان البيت من الفرحه
تخلينى أحس عتاب
خساره لو تبيع بيتك
ب أحلامه وترحاله
ف هوجه م الحنين
تِشتى
على قلبك تدق دموع
ومين قالك
حيطان البيت ب تتكتف
وتقبل كسرتك ب خضوع
ده أنا يا صبر بكتبلك
وأنا موجوع
أنا موجوع