الأدب
بكاء مكتوم
محتاج اقول
وخايف أقول العمر ما يكفيش
اليوم بيجرى والسنبن بتمر
وكل ساعه زمن باشرب كؤوس المر
صبرك عليه بقى يا صبر
نفسى أعيش
أرمى حمول زمنى على كتفى
العليل بالجرح
خايف حروف قلبى تسكت وما تغنيش
محتاج أقول
عايش
وافتح بيبان الأمل جوايا من بدرى
وأسرح كما الدراويش
واحضن حيطان بلدى وامشى ف شوارعها
وادخل جوامعها
واتوضى فى السيدة
وابكى على دراعها
وامسح دموع بلدى
واغسل مواجعها
وانسى سنين الطيش
محتاج أقول نفسى ف رغيف الغلابة متحنى بالمواويل
وناكله ونغمسه بالصبر والرضوان
ونسد جوع الليل
محتاج غناك يا شقى قوت الصنايعيه
هيله هيله ياللا يا رجاله
هيله هيله وسط القياله
هيله هيله دى بلدنا عزيزه
هيله هيله دا الحب غريزه
وسط العرق دمعة رغيف العيش
محتاج أقول غنوه
واوصف عناد البحر والأمواج
والصبر هو الأمل وسط المراكبيه
محتاج أقول بلدى
محتاج غنا ولدى
يا أرضى يا سندى
يبكى تراب الوطن
بكفايه ما تبيعنيش
أنا شيلت هم سنين كله على دراعى
كنت ابكى مره واضحك على الهامش
واجرى أوام على الامل يمكن أكون منه
بس الاكيد يا زمن
رجلى ما بتشيلنيش
محتاج اقول
بس اللى يفهمنى
يعرف أصول البكا ودموع بتغسل أرض
وإيدين تصون العرض
وبتفهم ان الوطن حقه علينا فرض
بس انت ليه يا زمن
حالف ما تنصفنيش
محتاج اقول
حبيت
غنيت
زى البشروالناس المحسوبين عالناس
زى القلوب الطيبه ثروتها فى الإحساس
يا ألف أه توجع كيان مهزوم
قلبى خلاص انتهى
بقى مستحيل
هيعيش
...................................................... بكاء مكتوم / أصلان أبو سيف
