يالَّا نتكلم عنها

ست الكل وع الراس مكانها

أنا المصري إللي اتربى ف خيرها

أنجَزت وف الفعل أوجزت ودا كله عشانها

عاشق تراب خطوتها

وافتخِر إني ابنها

وشموخي وعزة نفسي بحظوتها

وأنا بنت البلد دي

وعلى حيطان بيتي صور ولادها

نجيب محفوظ وطه حسين والعقاد

أم كلثوم والأبنودي مجدي يعقوب وغُنيم

شادية وعبد الوهاب وحليم

ويا عيني ع النغم الأصيل

والكتف والسَّند اللي ما بيميل

وقت الشدة تلاقي رجالة

وستات شاطرة والحِمل شيَّالة

بسمة فجرها بادية

وشمسها مضوِّيَّة وهادية

ولِبسِت سينا الطرحة النادية

والنسر الدهبي طاير

والراية ترفرف والقلعة عليها تشاوِر

وأهرامات الخلود

ثابتة وراسخة تدهِش كل الوجود

وأبو الهول يزأر خير الأسود

شوقي قالها زمان ... مش قالها؟

الأم مدرسة إذا أعددتها أعددت شعبا طيب الأعراق

قالها زمان الأم علامتها ف ولادها تبان

ردِّت وقالت انا ابني شقيان

بيزرع ف أرضي ومع السيَّاح يرطُم خواجاتي كمان

مين قال إنه غلبان؟

ده بيلبد ف جحر التعبان

ووقت الجد يلدغ كل خسيس وجبان

انا ابني جوه المصنع شغَّال

تروس دايرة ف كل مجال

انا ابني طالع النخل

والصحرا أبراجها خيال

أنا ابني يهندس هندسة

ف التكنولوجيا الحديثة عالم

بالمسطرة بيسطَّر مستقبل وطن

مش كلام ولاقلنا وقال

دي حقيقة وواقع تعالوا شوفوا المدرسة

وهناك ف جامعة زويل

آدي حصاد الأجيال

ومهما يحاولوا يطَفُّوا ف قلوبنا النور

إحنا الشُعلة وإحنا النار

بطَّلوا بقى لت وعجن وزن

إحنا إللي رئيسنا ما بيرتاح ولا بيْوِن

وجيشنا أذرع مفرودة

وقوِّتُه وسطوته على كل الحدود غير محدودة

إلعب بعيد يا شاطر انت وهو

إحنا سلاحنا عزيمة وقوة

يا أرض الفيروز والزيتون

أمَّا عليكِ شجرة تين حلوة!

قال إيه تهجير بالعافية!

نسيوا قوام الضربة القاضية!

نفَكَّرهم بأكتوبر المجيد

طب يا منسي احكيلهم أقرب حاجة

وإننا بنقَدِّم أرواحنا فداها عبادة

يا ولاد يا ولاد توت توت

تعالوا نحضر أبلة فضيلة

دي هتحكيلنا حكاية جديدة

دي راكبة قطْر عبد المنعم مدبولي

وده قطْر صغنتوت بيقول توت توت

إحنا نطَوَّر واللي يطق يموت

ماكرون بارليه فرانسيه

بيحب مصر الكل يقول أوكيه

وكوريا والصين بتحيِّينا يا بيه

الله ع اللمة الحلوة والرسم على تقيل

تحب اعزمك على ايه؟

أكلة سمك متينة؟

بورسعيد ولَّاا السويس ولَّاا اسكندرية

ع الشط الصيد ده عندي غِيَّة

الأقصر وأسوان وكرم أخلاق يا زول

إحنا أصحاب البروتوكول

إحنا نسل الأشراف ادخلوها آمنين

اخلع نعليك دي أرض الأطهار

هنا موسى كلِّم ربُّه

عدَّى علينا كتير محتلَّين

ومحميين ليوم الدين

والثعلب من مقاومتنا بيستسلم من غُلبُه

ترابنا ده خط أحمر

ولا ذرة ف خيالك تتمنى ولا تهَوِّب ولا تقدر

إحنا شعب حُر الإرادة

والعمل عندنا فرض والجهل نبيدُه إبادة

ومين ميحبش فاطمة وليالي الحلمية والهجان

وتراثنا الفني وأساطيرنا وجمعة الشوان

والسعدني ف أرابيسك وحارتنا المصرية

وحرية الصحافة وكلمتنا مسؤولية

أجسادنا الدرع الحامي

فداكي يا مصر إحنا فداكي

إحنا إللي دايما بنكيد الأعادي

بحبك يا بلادي بحبك يا بلادي